«Հրապարակ». Սերժ Սարգսյանը մաքրել է քաղաքական դաշտը

Մինչ հայաստանյան շատ լրատվամիջոցներ գրում են երկրի ներսում ՀՀ նախագահի դիրքերի թուլացման մասին, ահա թե ինչ կարծիք ունի այդ մասին ռուսաստանցի մեկնաբան եւ փորձագետ Վադիմ Դուբնովը: «Ազատությանն» ասում է. եթե արտաքին քաղաքականությունում Հայաստանի նախագահը, փորձագետներից շատերի կարծիքով, բավական թույլ դիրքեր ունի, ապա երկրի ներսում, ըստ Դուբնովի, նրա դիրքերն ամուր են. «Նա մաքրել է քաղաքական դաշտը: Տանուլ տալով շատ բան արտաքին դաշտում' սեպտեմբերի 3-ից հետո Սերժ Սարգսյանը լրջորեն ամրապնդել է իր դիրքերը երկրի ներսում»։ Գրում է «Հրապարակ»-ը:

Սա ես մեջբերում եմ հատուկ նրանց համար, ովքեր լծված են մարդկանց զգոնությունը թուլացնելուն, բթացնելուն ու ընդվզող խմբերին անընդհատ կերակրում են՝ մի քիչ էլ համբերեք, հեսա, հեսա, իշխանափոխություն է լինելու: Ու նույնիսկ խոսվում է սահուն իշխանափոխության մասին: Մի բան է ինձ զարմացնում՝ իշխանության մեջ ողջ վերադասավորումները եղան անձայն, անծպտուն, միայն մարդիկ էին այսուայն կողմից խեղդվողի պես ձայն հանում, ո՞վ դիմադրեց, ո՞ր քաղաքական ուժը:
Քաղաքական դաշտն իրոք մաքրվել է, եւ դա այնքան պարզ է, ինչքան՝ եթե ջրի մեջ տեսնեն մեր անդրադարձը: Այդ ի՞նչ է ուզում անել ՀՀ նախագահը, որ չի կարողանում անել, այդ ի՞նչ որոշում է ուզում անցկացնել, որ չի անցկացնում: Կասեք՝ մեծամասնություն է, արհեստական մեծամասնություն: Նման պարագայում ի՞նչ են անում: Նման պարագայում դիմում են ժողովրդի օգնությանը: Փողոց են հանում ժողովրդին: Դա միակ միջոցն է իշխանության վրա ճնշում գործադրելու համար: Իսկ ի՞նչ է կատարվում: Միասնական պայքարի գոտի չի ստեղծվում: Մասնատվել է ժողովուրդը ու մաս-մաս է հանվում դաշտ: Ավելի պատմությունը: Անընդհատ լսում եմ՝ այս խումբն է պայքարում, այն խումբն է պայքարում, չքաղաքականացնել…

Եվ հետո կարող են առանց խղճի խայթի ասել՝ քառյակն այս որոշեց, քառյակն այն որոշեց: Էլի խորհրդավոր սպասումի շղարշը երկարում է: Նման պարագայում հիշում եմ կրիայի պատմությունը: Նրան ջրի են ուղարկում, եւ մի քանի օր անցնում է՝ չկա: Վերջը բարկանում են ու իրենց դժգոհությունը բարձրաձայնում՝ դրան չպիտի ուղարկեինք, դանդալոշի մեկն է, մեզ խաբեց… Այդ խոսակցության վրա մի քանի մետր հեռավորության վրա գտնվող կրիան արձագանքում է՝ դե որ տենց եք ասում, էլ չեմ գնում: Հիմա քառյակն է, մի քիչ էլ խոսեցինք, կասեն՝ էլ չենք գնում: Գնում եք, էլ ի՞նչ անեք, էլ բերելու բան չկա, գնացեք, միացեք, միասին մի լավ ջուր խմեք, անցավորներիս էլ օղորմի տվեք:

Շարունակությունը` «Հրապարակ»-ի այսօրվա համարում: