«Հրապարակ». «Երևանի կենտրոնում որոշել են գյուղական միջավայր ձևավորել»

Կառավարական երրորդ մասնաշենքի դիմաց՝ Վերնիսաժին հարող տարածքում, վերջերս անճոռնի մի շինություն է հայտնվել` երկաթե «դոմիկ»: Վերջինս տեղակայված է կանաչ տարածքի վրա։ Անցորդները կկարծեն, թե Երեւանի կենտրոնում որոշել են գյուղական միջավայր ձեւավորել, կամ էլ կարող է թվալ, թե դա բոմժերի ապաստան է։ Չի բացառվում, որ այն ծառայի մուրացկաններին, քանի որ այգին երեկոյան ժամերին նրանց համար քնելու վայր է հանդիսանում։ Տնակի մասին Վերնիսաժի աշխատակիցները որեւէ տեղեկություն չունեին, նրանք զարմանք են ապրել, երբ առավոտյան եկել են աշխատանքի ու տեսել այս տնակը։

«Այդ հատվածում մի բոմժ կա, ամբողջ օրը մնում ա ըտեղ, մտածեցի՝ երեւի կառավարությունը, իր մասին մտածելով, տնակ ա հատկացրել, բայց պարզեցինք, որ՝ չէ, իսկ թե ինչի համար է, տեղյակ չենք»,- ասաց Վերնիսաժի աշխատակից տիկին Զոյան։ «Վերնիսաժ» ՍՊԸ-ի տնօրինությունից մեզ տեղեկացրին, որ իրենք այդ շինության հետ որեւէ առնչություն չունեն, այդ տարածքն իրենց չի պատկանում։ Ամիսներ առաջ էլ այնտեղ քարե շինություն էին կառուցում, որը, ասում էին՝ մետրոյին է պատկանում, սակայն պարզվեց՝ մետրոպոլիտենի տնօրինությունը դրա մասին տեղեկություն չունի, եւ դա էլ է կիսակառույց մնացել։
Կենտրոն վարչական շրջանի աշխատակազմից տեղեկացանք, որ ժամանակավոր կացարանը կամ տնակը տեղադրվել է տարածքում՝ որպես աշխատանքային տնակ բարեկարգման աշխատանքներ իրականացնող բանվորների համար։ «Բանվորներն այնտեղ պահում են իրենց գործիքները, հագուստները։ Այն ժամանակավոր է, աշխատանքներն ավարտելուց հետո կտեղափոխվի, եւ տարածքը կվերադառնա իր նախկին տեսքին»,- ասաց քաղաքապետարանի տեղեկատվության եւ հասարակայնության հետ կապերի վարչության պետի տեղակալ Արթուր Սարուխանյանը։

Այդ տնակն այգում տեղադրվել է ոչ թե այգին բարեկարգող բանվորների, այլ հարակից տարածքների, մայթերի բարեկարգումն իրականացնող շինարարների համար։ Բայց քաղաքապետարանը չի էլ մտածում վերացնել հրապարակին հարող այս «բոմժանոցը», այլ նպաստում է, որ այն վերածվի աղբանոցի։ Այդ հատվածում բարեկարգման աշխատանքներ դեռեւս չեն տարվելու, եւ այգին մնալու է բարձիթողի վիճակում։ Տարածքի նոր տերերի անունները խնամքով թաքցվում են հանրությունից, չի բացառվում, որ նախարարությունից մի քանի մետր այն կողմ վեր խոյանա նոր էլիտար շենք, քանի որ առանց որեւէ տրամաբանության երեւանյան այգիները եւ կանաչ տարածքները մեծամասշտաբ շինհրապարակներ են դառնում։ Ոչինչ, որ քաղաքի կենտրոնը վերածվում է գյուղի։

Շարունակությունը` «Հրապարակ» օրաթերթի այսօրվա համարում: