Գալուստ Սահակյանն ընդունել է ՀՀ-ում Սիրիայի գործերի ժամանակավոր հավատարմատարին

ՀՀ ԱԺ նախագահ Գալուստ Սահակյանը հունիսի 4-ին ընդունել է ՀՀ-ում Սիրիայի Արաբական Հանրապետության գործերի ժամանակավոր հավատարմատար Իսսամ Նայալին: Հանդիպմանը ներկա են եղել Հայաստան-Սիրիա բարեկամական խմբի ղեկավար Խոսրով Հարությունյանը, ԱԺ գլխավոր քարտուղար Հրայր Թովմասյանը: Հանդիպման ընթացքում քննարկվել են հայ-սիրիական հարաբերություններին, տարածաշրջանային խնդիրներին վերաբերող հարցեր, երկուստեք կարևորվել է միջխորհրդարանական համագործակցության հետագա զարգացումը:

ԱԺ նախագահ Գալուստ Սահակյանը նշել է, որ երկու երկրներին և ժողովուրդներին ավանդաբար կապող բարեկամությունը պիտի շարունակվի և խորանա: Նրա խոսքով` Սիրիան առանձնահատուկ տեղ է զբաղեցնում ՀՀ արտաքին քաղաքականության մերձավորարևելյան ուղղությունում և Հայաստանն ուշադրությամբ հետևում է Սիրիայում արդեն մոտ երեք տարի տեղի ունեցող իրադարձություններին: ԱԺ նախագահը մտահոգություն է հայտնել Սիրիայում շարունակվող բախումների կապակցությամբ, որից լրջորեն տուժում է երկրի քաղաքացիական բնակչությունը, այդ թվում՝ սիրիահայությունը: Նա մտահոգություն է հայտնել նաև 2014թ. մարտին Սիրիայի հյուսիս-արևմտյան Քեսաբի շրջանի հայաբնակ գյուղերում ռազմական բախումների պատճառով ստեղծված իրավիճակի առնչությամբ, որի հետևանքով եղել են զոհեր, հարյուրավոր սիրիահայ ընտանիքներ լքել են իրենց տները: Գալուստ Սահակյանը հույս է հայտնել, որ Սիրիայում կհաստատվի խաղաղություն, կայունություն և հասարակական համերաշխություն:

Շնորհավորելով Գալուստ Սահակյանին ԱԺ նախագահ ընտրվելու կապակցությամբ` Սիրիայի գործերի ժամանակավոր հավատարմատարը Ազգային ժողովի նախագահին ներկայացրել է Սիրիայում ստեղծված ներքաղաքական իրավիճակը, վերջին զարգացումները և դրական միտումները, անդրադարձել երեկ կայացած նախագահական ընտրություններին:

Հանդիպման ընթացքում արծարծվել են փոխադարձ կարևորություն ունեցող նաև այլ հարցեր: