«Զվարթնոցում» նախորդ տարվա մայիսի համեմատ ուղևորահոսքն աճել է 36,9 տոկոսով

Օդային փոխադրումների ոլորտում վերջին ամիսներին արձանագրվել է ուղևորների և չվերթերի թվի կանոնավոր աճ, ինչը ՀՀ կառավարության կողմից հայտարարված «Բաց երկնքի» քաղաքականության արդյունք է: Ինչպես տեղեկացնում են «Արմենիա միջազգային օդանավակայաններ» ՓԲԸ-ից, 2014թ. մայիսին 2013թ. նույն ժամանակահատվածի համեմատ «Զվարթնոցում» ուղևորահոսքն ավելացել է 36,9 տոկոսով: Եթե 2013թ. մայիսին «Զվարթնոց» միջազգային օդանավակայանի ծառայություններից օգտվել է 125 263 ուղևոր, ապա 2014թ. մայիսի ցուցանիշը կազմում է 171 431 ուղևոր:

Չվերթերի աճն այդ ժամանակահատվածում կազմել է 49.4 տոկոս: 2014թ. մայիսին կատարվել է 1858 չվերթ' նախորդ տարվա նույն ժամանակահատվածի 1244 չվերթի համեմատ: Եթե 2013թ. մայիսին դեպի «Զվարթնոց» կանոնավոր չվերթեր իրականացնում էին 27 ավիաընկերություններ, ապա այժմ դրանց թիվը 33 է: Բացի այդ, ավիաընկերություններից շատերն ավելացրել են իրենց հաճախականությունները բոլոր ուղղություններով, ինչը հանգեցրել է ավիատոմսերի գնի նվազմանը: