«Հրապարակ». Գառնու տաճարի հարեւանությամբ սրճարանի տեղադրման աշխատանքներ չեն կատարվում

Ամիսներ առաջ «Պատմամշակութային արգելոց-թանգարան» ՊՈԱԿ-ը եւ մշակույթի նախարարությունը պայքարում էին Գառնու տաճարի բաղնիքի հարեւանությամբ, ինչպես իրենք էին բնորոշում՝ շարժական սրճարան հիմնելու համար, ասում էին, որ այդկերպ զբոսաշրջությունն են զարգացնելու եւ ստացված եկամուտներով տարածքն են բարեկարգելու։ Իսկ Գառնիի գյուղապետը եւ տաճարի ճակատագրով մտահոգ քաղաքացիներն էլ պայքարում էին այդ սրճարանը կառուցելու դեմ։ Այսօր երկու կողմում էլ լռություն է, կարծես թե համաձայնության են եկել։ Գառնիի գյուղապետ Աշոտ Վարդանյանը մեզ տեղեկացրեց, որ սրճարանի տեղադրման աշխատանքներ չեն կատարվում։

«Աչքերս չորս արած հետեւում եմ, որ հանկարծ շինարարություն չվերսկսվի, այն էլ այս ժամանակահատվածում, երբ զբոսաշրջիկներն այցելում են Գառնիի տաճար»,-ասում է նա՝ նշելով, որ տաճարի ճակատագրով մտահոգ քաղաքացիների շնորհիվ սրճարանի տեղադրման գործընթացը կասեցվել է։ Հիշեցնենք, որ մի քանի տասնյակ մտահոգ քաղաքացիներ ամիսներ առաջ ուղեւորվել էին Գառնի' սեփական ուժերով կանգնեցնելու շինարարությունը: Ի նշան բողոքի շինհրապարակի խճաքարերը լցնելով պարկերի մեջ՝ նրանք տեղափոխել էին Երեւան տեղադրելով մշակույթի նախարարության շենքի առջեւ։ «Կարծես թե մեր ուղարկած մեսիջը տեղ հասավ, շինարարությունը չդադարեցնելու դեպքում ավելի կտրուկ քայլեր կձեռնարկենք»,-ասաց «Գնում ենք Գառնու կաֆեի ավազը դատարկենք» նախաձեռնության անդամ Անի Նավասարդյանը։

Շարունակությունը` «Հրապարակ» օրաթերթի այսօրվա համարում: