«Հրապարակ». ՀՀ նախարարները չեն խրախուսում օտարերկրացիների ներդրումները մեր տնտեսության մեջ

Պարզվում է՝ մեր դիվանագետներն անհամբեր սպասում էին, թե երբ պիտի Հովիկ Արգամիչը կարգվեր վարչապետ, որպեսզի բողոքեին մեր նախարարների անբանությունից: Կառավարության երեկվա 20 րոպեանոց նիստի ավարտին Հովիկ Աբրահամյանն իր ոսկեղենիկ հայերենով ապաշնորհ նախարարներին փոխանցեց հայ դիվանագետների դժգոհությունը:

Այս օրերին Հայաստանում դիվանագիտական մեծ հավաք է, որին մասնակցող դեսպանները Արգամիչին պատմել են, որ ՀՀ նախարարները չեն խրախուսում օտարերկրացիների ներդրումները մեր տնտեսության մեջ: «Մի երկու հարց կա, որոնց վերաբերյալ դեսպանները կառավարության ուշադրությունն են հրավիրում: Խոսքը հետեւյալն է. ես իրենց առաջարկել եմ, որ նաեւ զբաղվեն Հայաստան ներդրումներ ներգրավելով: Ի՞նչ են ասում դեսպանները՝ որ իրենց առաջարկները նախարարների կողմից պատշաճ ուշադրության չեն արժանանում, իսկ եթե նույնիսկ արժանանում են, ապա դեսպանները դրանց տեղեկացված չեն: Կոնկրետ փաստեր են նշել»,-սպառնալից հայտարարեց, բայց չհրապարակեց այդ «փաստերը»:

Ասաց՝ դեսպանները նաեւ բողոքում են, որ նախարարություններից չեն ստանում ներդրումային ծրագրերի առաջարկություններ: «Եթե դեսպանը պետք է հանդիպի տվյալ երկրի գործարարներին, ներդրողներին, ապա պետք է ձեռքի տակ ունենա ծրագրեր, որպեսզի դրանք ներկայացնի ներդրողներին: Ուստի համապատասխան նախարարները, նախարարությունները պետք է մտածեն, որպեսզի դեսպաններին տրամադրեն լիարժեք ներդրումային ծրագրեր: …Համապատասխան նախարարներին հանձնարարում եմ, որպեսզի պատրաստեն ծրագրեր եւ արտաքին գործերի նախարարի միջոցով ներկայացնեն դեսպաններին»,-ասաց գործադիրի ղեկավարը՝ առանց գաղտնազերծելու անբան նախարարներին: Միայն հանձնարարեց աշխատակազմի ղեկավարին զբաղվել այդ նախարարներով:

Շարունակությունը` «Հրապարակ» օրաթերթի այսօրվա համարում: