«Հրապարակ». Արտակ Կարապետյանը բողոք է ներկայացրել Փաստաբանների պալատ` ընդդեմ փաստաբանի

Արտակ Կարապետյանը երեկ բողոք է ներկայացրել Փաստաբանների պալատի նախագահ Արա Զոհրաբյանին ընդդեմ փաստաբան Վարդուհի Էլբակյանի, որը պաշտպանել է ակտիվիստի շահերը:

Արտակ Կարապետյանն այն ՀԱԿ ակտիվիստների թվում էր, ով 2011թ. օգոստոսին Կարապի լճի մոտ բախում ունեցավ ոստիկանների հետ, իսկ հետագայում Տիգրան Առաքելյանի եւ մյուսների հետ քրեական հետապնդման ենթարկվեց: Նրան մեղադրեցին խուլիգանության, իշխանության ներկայացուցչի նկատմամբ բռնություն կիրառելու մեջ եւ կալանավորեցին: Հետագայում վերաքննիչ դատարանի որոշմամբ կալանքը փոխարինվեց գրավով՝ 3 մլն դրամի չափով, ապա 2013թ. հոկտեմբերին համաներմամբ ազատեցին պատժից: Սակայն մինչ օրս Արտակ Կարապետյանին չի հաջողվել հետ ստանալ գրավի գումարը, որը նա պարտքով վերցրել էր հարազատներից, եւ որը պետությունը ետ է վերադարձնում դատական գործընթացից հետո: Նա վստահեցնում է, որ գումարը դուրս է գրել իր շահերի պաշտպան Վարդուհի Էլբակյանը, որը նաեւ ՀՀՇ վարչության անդամ է: «Ես այդ գումարը վերցրել էի հարազատներից,- պատմում է Արտակը:

- Փետրվարի կեսերին, երբ վճիռն արդեն օրինական ուժի մեջ էր մտել, դիմեցի նրան փողը ստանալու համար: Բայց նա մոտ մեկ ամիս ձգձգեց գումարը բանկից ստանալու գործը: Ինձ ասում էր, որ ինչ-որ փաստաթղթեր է պատրաստում, ինչ-որ պրոցես է սկսել, որ ես ստանամ իմ փողը: Հետո այլ ճանապարհով ճշտեցի, որ գումարը դուրս է գրված բանկից, եւ Վարդուհի Էլբակյանն ավելի քան մեկ ամիս առաջ ստացել է այն»: Արտակ Կարապետյանը փորձել է պարզաբանումներ ստանալ Վարդուհի Էլբակյանից, բայց, ի պատասխան, անհասկանալի պատճառաբանություն է ստացել, թե ՀԱԿ-ն իրեն գումար էր պարտք, եւ այդ փողը նա վերցրել է պարտքի դիմաց: «Քանի որ ես ՀԱԿ համակիր էի, եւ իմ նկատմամբ իրականացվող քրեական հետապնդումը կրում էր քաղաքական բնույթ, բնականաբար, առաջին իրավական օգնությունն ինձ ցուցաբերեց ՀԱԿ-ը: ՀԱԿ ղեկավարներն իմ փաստաբանին են տրամադրել 3 մլն ՀՀ դրամ՝ ՀԱԿ իրավական ներկայացուցիչ Արմեն Խաչատրյանի միջոցով: Նա Վարդուհի Էլբակյանի հետ եղել է «Հայէկոնոմբանկ»-ում եւ կատարել է վճարումը:
Նույն օրը, նրանց օգնությամբ, իմ փաստաբան Վարդուհի Էլբակյանի ձեռքով գումարը վճարվել է դատարանի դեպոզիտ հաշվին»,- պատմում է Կարապետյանը: Փաստաբանների պալատի նախագահ Արա Զոհրաբյանից նա խնդրում է կարգապահական վարույթ հարուցել Վարդուհի Էլբակյանի դեմ, բայց մինչեւ նրան դիմելը փորձել է պրոբլեմը հարթել ընդհանուր ընկերների միջոցով: Վարդուհի Էլբակյանը հայտնեց, որ ոչ թե ՀԱԿ-ն է 3 մլն դրամը որպես գրավ վճարել, այլ ինքը, իր անձնական գումարներից: «Հակառակ դեպքում, եթե ես չվճարեի, Արտակ Կարապետյանը մնալու էր կալանքի տակ: ՀԱԿ-ը թող պարզի իմ գումարների հետ կապված հարցերը, հետո Արտակ Կարապետյանը թող իր հարաբերությունները ՀԱԿ-ի հետ պարզի»: «Արտակ Կարապետյանն ի՞նչ կապ ունի ՀԱԿ-ի եւ Ձեր հարաբերությունների հետ» հարցին փաստաբանը պատասխանեց. «Եթե իրենք ազնիվ են, թող ազնիվ դաշտում փորձեն գործել: Եթե կկարողանան ապացուցել, որ դա իմ գումարը չի, դա ուրիշ խնդիր է: Դա ես վճարել եմ որպես Արտակ Կարապետյանի պաշտպան, վճարել եմ բանկում, իմ անձնագրով, անդորրագիրն էլ ինձ մոտ է: Ես էլ դատարանից ստացել եմ գումարը»:

Խոսեցինք նաեւ ՀԱԿ իրավական հանձնաժողովի ներկայացուցիչ Արմեն Խաչատրյանի հետ: «ՀԱԿ-ն այդ գումարը վճարել է Արտակ Կարապետյանի խափանման միջոցը փոխելու համար, հետո Արտակն այն վերադարձրել է մեզ: Վարդուհի Էլբակյանը ստում է, ինչը վայել չի փաստաբանին»,- ասաց Արմեն Խաչատրյանը: