«Հրապարակ». Աջ ու ձախից լսում ենք բժշկական սխալների մասին

Նախօրեին վանաձորցի փոքրիկի մահը երկու օր է՝ մտքիցս չի գնում: 4-ամյա երեխան ջրծաղիկ է ընկել, ծնողները հատուկ զգուշություն են ցուցաբերել՝ իբր բարդություններից խուսափելու համար, եւ իրենց ունեցած ամենաթանկ բանը վստահել են բժիշկներին: Օրեր առաջ Գյումրիում ծննդկանի ու նորածնի մահվան լուրը ստացանք: Մի քանի օր առաջ մի երիտասարդի մայրն էր բողոքում, որ սխալ ախտորոշում են արել եւ սխալ բուժում նշանակել որդուն:

Երկարատեւ բուժման ընթացքում մահվան հետ համընթաց են քայլել, այդ ընթացքում տղայի հայրն է մահացել, ապա պարզվել է՝ ախտորոշումը սխալ է, եւ բուժումն էլ՝ անիմաստ: Ինչքան նյարդեր, ապրումներ, ֆինանսներ են ծախսվել: Հիմա տուժածները փոխհատուցում են պահանջում: Շատ հնարավոր է, որ այս բոլոր դեպքերում բժիշկների մեղքը չկա կամ փոքր է, բայց մենք ամեն օր աջ ու ձախից լսում ենք բժշկական սխալների մասին: Լսում ենք, թե ինչպես են մարդկանցից փող շորթում եւ ստիպում ահռելի գումարներ վճարել ցանկացած բուժման համար:

Հիվանդանոցներում սարսափելի հերթեր են, տխուր, հյուծված, հույսը կորցրած մարդիկ: Ո՞ւր է գլորվում մեր բժշկությունը, որը փառահեղ անցյալ ունի եւ հարուստ պատմություն: Մի՞թե արտագաղթի կործանարար գավազանն այս ոլորտն էլ է ավերել՝ լավագույն մասնագետներին երկրից դուրս հանելով:

Շարունակությունը` «Հրապարակ» օրաթերթի այսօրվա համարում: