Դեռևս վաղ է

«Այժմ Հայաստանի ներքաղաքական իրավիճակը կարևորությունն ինչ-որ առումով կորցրել է: Քաղաքականության մեջ բոլորին թվում է, թե անպայման ամեն օր պետք է միտինգներ արվեն, ամեն օր հեղափոխություն պետք է լինի, մարդիկ գնան, գան, բայց այդպես չէ քաղաքականությունը»: Այս մասին Լուրեր.com-ի հետ զրույցում ասաց «Նոր ժամանակներ» կուսակցության նախագահ Արամ Կարապետյանը:

Վերջինիս կարծիքով՝ ներքաղաքական հարցը մղվել է երկրորդ պլան, իսկ պատճառն այն է, որ աշխարհը դիմակայության մեջ է:

«Դիմակայության պայմաններում միշտ կարևորվում է երկրի արտաքին քաղաքական գործառույթները: Աշխարհն այժմ դիմակայության մեջ է, և հիմա մեզ համար ամենալուրջ երկիրը, որն ապահովում է շատ բաներ մեզ համար, այդ դիմակայության ակտիվ կողմն է:

Ժողովուրդը մտածում է, որ ոչ մեկ չի ուզում պայքարել, բայց այդպես չէ, սա փուլ է, որի ընթացքում կարևորվում է արտաքին վեկտորի գործողությունները, Հայաստանը գնում է Մաքսային միության և Եվրասիական տնտեսական միության մեջ ընդգրկվելու»,- ասաց կուսակցության ղեկավարը: 

Արամ Կարապետյանն` անդրադառնալով քառյակի կողմից իշխանություններին ներկայացվելիք 12 կետանոց պահանջագրին, նշեց.

«Ես լինեի` տնտեսական մաս դեռ չէի ընդգրկի այդ պահանջագրի մեջ, որովհետև Հայաստանի ընդգրկումով ՄՄ և Եվրասիական տնտեսական միություն, կարող է այնպիսի բաներ փոխվել, որ այդ պահանջների մեծ մասը ակտուալ չլինեն: Հայաստանը հիմա քայլ է անելու, որից հետո տնտեսական կացութաձևի մեջ փոփոխությունները կերևան՝ կլինեն դրանք, թե չեն լինի: Եթե այդ պահանջները վերաբերում են կոռուպցիային, հովանավորչությանը, մոնոպոլիաներին` դա, գիտե՞ք, ինչքան ես հիշում եմ, մենք դա ասում ենք, և ոչինչ չի փոխվում: Ես տնտեսական մասին ձեռք չէի տա, եթե հարցը չի վերաբերելու պոպուլիզմին կամ չի վերաբերելու այն հարցերին, որոնք բարձրացվում են և լուծում չեն ստանում: Ճիշտն ասած` դժվար էլ եմ պատկերացնում, որ այն մարդիկ, որոնք ջատագովն են լինելու այդ 12 կետերի մոնոպոլիաների դեմ, կարող են դա անել, այնտեղ կան մարդիկ, որոնք իրենք էլ են մոնոպոլիստ»:

Արամ Կարապետյանի կարծիքով՝ այս պահին ներքաղաքական հարցերի շուրջ քաղաքական տեսակետ հիմա արտահայտելը մի քիչ վաղաժամ է: «Դրա պահն էլ կգա, երբ աշխարհի դիմակայությունը կերևա, թե ինչ ուղղությամբ է զարգանում, որովհետև դեռ նոր սանկցիաներ են կիրառվելու Ռուսաստանի դեմ, գնալու են շատ լուրջ փոփոխություններ` Ուկրաինայի հետ կապված: Սրանք հարցեր են, որից հետո մենք նոր կկարողանանք քաղաքական կյանքը տանել այն ուղղությամբ, որ համ փոփոխությունների հասնենք, համ քաղաքացիական պատերազմի մեջ չընկնենք»,- եզրափակեց Կարապետյանը: