«Ստո՛պ, խուլիգաննե՛ր, բավական է աշխատեք վնասով». կառավարությունը սակագները վերանայում է քարտուղարուհու զանգի հետևանքով

Եվ այսպես, Հովիկ Աբրահամյանի կառավարության առաջին «կինդեր սյուրպրիզը» էլեկտրաէներգիայի սակագների թանկացումն էր: ՀՀ հանրային ծառայությունները կարգավորող հանձնաժողովի նախնական գնահատմամբ՝ էլեկտրաէներգետիկական համակարգի ընկերությունների ֆինանսական կայունության և սպառողներին հուսալի ու անվտանգ էլեկտրամատակարարման ապահովման նպատակով անհրաժեշտ է շուրջ 20 մլրդ դրամ (առանց ԱԱՀ-ի) լրացուցիչ գումար: Ընկերություններում առաջացող ֆինանսական ճեղքվածքը փակելու համար նախատեսվում է բոլոր սպառողական խմբերին մատակարարվող էլեկտրաէներգիայի գործող սակագների բարձրացում 3,8-4,3 դրամ/կՎտժ-ի (ներառյալ ԱԱՀ-ն) սահմաններում:

Ընդ որում, այս թանկացման պահանջատերը ոչ թե Հայաստանի էլեկտրական ցանցեր ընկերությունն է կամ էլ.էներգիա արտադրողները, այլ... ՀՀ կառավարությունը, մասնավորապես ՀՀ հանրային ծառայությունները կարգավորող հանձնաժողովն է իր նախաձեռնությամբ սկսել է էլեկտրաէներգիայի արտադրության և ծառայությունների մատուցման, ինչպես նաև վերջնական սպառողներին վաճառվող էլեկտրաէներգիայի սակագների վերանայման գործընթացը:

Փաստորեն մինչև այժմ այդ ընկերությունները սուս ու փուս, միամիտ աշխատել են վնասով և օրերից մի օր խիստ ազգափրկիչ հանձնաժողովի նախագահը Միկոյանի դեմքի խստությամբ ասել է՝ ստո՛պ, խուլիգաննե՛ր, բավական է աշխատեք վնասով, թանկացնում ենք և վե՛րջ: Վաղը, օրինակ, հանձնաժողովը կարող է ուսումնասիրել և պարզել, որ 2016 թվականին Մոզամբիկում հղիների քաղցրակերության տոկոսի բարձրացման հետևանքով աշխարհում կարող է թանկանալ շաքարավազի գինը և առաջարկել 10 տոկոսով թանկացնել այն: Ընդ որում, հանձնաժողովի հայտարարությունից այդպես էլ անհայտ է մնում, թե ով է թանկացումների հասցեատերը և ում են գնալու լրացուցիչ գումարները: Էլ. էներգիայի արտադրման ինքնարժե՞քն է թանկացել, թե այն սպառողին հասցնելը: Եվ այդ ի՞նչ կանխատեսումներ են, որի հիման վրա պետք է այսօր արդեն թանկացնել տնտեսության համար հանգուցային ծառայություններից մեկը:

Սակագների բարձրացման հարցում ինքնագործունեության դիմած սույն պատվարժան հանձնաժողովն իր այս քայլը հիմնավորում է նրանով, որ 2014-2015 թվականներին սպասվում են էլեկտրաէներգետիկական համակարգի ընկերությունների տնտեսական գործունեության արդյունքների վրա ազդող գործոնների էական փոփոխություններ: Հասկանալի է, չէ՞, որ հանձնաժողովը չի կարող կանխատեսել բնական աղետներ, որոնք կտապալեն հարյուրավոր էլեկտրասյուներ, ընկերություններին կգցեն զգալի ծախսերի տակ: Ըստ էության, կառավարությունը նախապատրաստվում է գազի գնի հերթական փոփոխությանը: Նախապատրաստվում է նենգ, դավադիր, մարդկանց նրբորեն մոլորեցնելով: Հայտնի է, որ էլեկտրաէներգիայի սակագների վրա ազդող որոշիչ գործոնը հենց գազի գինն է:

Հովիկ Աբրահամյանի կառավարության գործունեության ամբողջ մեխը քարոզչությունն է: Մարդիկ անելիք չունեն և ամբողջ օրը «ջանգյուլում» են կանչում, տանգո են պարում, ոտանավորներ են ըմբոշխնում: Իսկ եթե լուսապայծառ ճակատն էկրաններին ամեն օր շողշողացնելուց զատ վարչապետը երբեմն ժամանակ գտներ և զբաղվեր երկրի տնտեսությամբ, թերևս իր հանձնաժողովներին կհուշեր, որ նրանք պարտավոր են պաշտպանել Հայաստանի քաղաքացու, ոչ թե օտարերկրյա ներդրողի շահերը: Մեր տնտեսությունը այլևս այնքան կախյալ վիճակում է, որ տնտեսվարողները հարկ չեն համարում պահպանել գոնե ձևական կողմը և դիմել հանձնաժողովին, այլ ընդամենը քարտուղարուհուն հանձնարարում են զանգել հանձնաժողով և պահանջել սակագների վերանայում: Իսկ եթե խնդիրը գլոբալ է և կապված է գազի սակագների նոր բարձրացումների հետ, պարզապես պարտավոր են ազնվորեն այդ մասին խոստովանել մարդկանց, ոչ թե դավադրաբար նախապատրաստել հերթական հարվածը մարդկանց ընտանեկան բյուջեին և գնալ էկրանների առաջ հերթական սարի սմբուլը բաղաձայնելու...

Ի դեպ, գազի և էլ. էներգիայի թանկացումը ուղղակիորեն ազդելու է լոլիկի ինքնարժեքին: Թերևս պարոն Աբրահամյանը ժամանակ ունի ուսումնասիրելու առավել քիչ ծախսատար կուլտուրաների մշակման հնարավորությունը:

Իսկ կառավարության շողշողուն գովազդային գործունեությունն առանձին անդրադարձի թեմա է...
Կանդրադառնամ...

Վարուժան Բաբաջանյան