ԼՂՀ նախագահը հրավիրել է Անվտանգության խորհրդի նիստ

Արցախի Հանրապետության Նախագահ Բակո Սահակյանը հունիսի 5-ին հրավիրել է Անվտանգության խորհրդի նիստ, որի օրակարգում ընդգրկված են եղել 2014թ. հացահատիկային մշակաբույսերի անվտանգ բերքահավաքը և հրդեհավտանգ ժամանակահատվածում առաջացող հրդեհների դեմ պայքարը արդյունավետ կազմակերպելու նպատակով իրականացվող միջոցառումներին և 2013 թվականի և 2014թ. առաջին եռամսյակի ԼՂՀ ժողովրդագրական ցուցանիշներին վերաբերող հարցեր: Ինչպես տեղեկացնում են Արցախի Հանրապետության նախագահի աշխատակազմի տեղեկատվության գլխավոր վարչությունից, համապատասխան զեկույցներով և ելույթներով հանդես են եկել վարչապետ Արա Հարությունյանը, Գյուղատնտեսության նախարար Անդրանիկ Խաչատրյանը, Արտակարգ իրավիճակների պետական ծառայության տնօրեն Արթուր Հարությունյանը, Ազգային վիճակագրական ծառայության նախագահ Կարեն Ներսիսյանը, պաշտոնատար այլ անձինք:

Երկրի ղեկավարը համապատասխան հանձնարարականներ է տվել կառավարությանը և շահագրգիռ մարմիններին' քննարկված հարցերի պատշաճ իրականացման ուղղությամբ: Բերքահավաքն արդյունավետ կերպով կազմակերպելու նպատակով` ԼՂՀ նախագահ Սահակյանը կառավարությանը հանձնարարել է մինչև 2014թ. հունիսի 15-ը հանրապետության գյուղատնտեսության նախարարի գլխավորությամբ ձևավորել օպերատիվ շտաբ:

Կառավարությունը նաև հանձնարարական է ստացել շահագրգիռ մարմինների ներգրավմամբ հանգամանորեն ու խորությամբ քննության առնել ժողովրդագրությանը վերաբերող հարցերը, անհրաժեշտության դեպքում լրամշակել ԼՂՀ ժողովրդագրական իրավիճակի բարելավմանն ուղղված համալիր միջոցառումների ծրագրի նախագիծը և այն ներկայացնել ԼՂՀ Նախագահին: