Արարատի մարզում պետական միասնական քննություններին կմասնակցի 811 շրջանավարտ

Արարատի մարզում այս տարի պետական միասնական քննությունների մասնակցության դիմում-հայտ է ներկայացրել 811 շրջանավարտ, ովքեր կհանձնեն 1703 քննություն' 12 առարկայից: Քննություններն իրականացվում են Արտաշատի թիվ 1 և թիվ 4 դպրոցներում: Ինչպես «Արմենպրես»-ին տեղեկացրեց մարզպետարանի աշխատակազմի կրթության, մշակույթի և սպորտի վարչության կրթության բաժնի վարիչ Ալբերտ Մկրտչյանը, հունիսի 2-ից մեկնարկած միասնական քննություններին «Կենսաբանություն» առարկայից մասնակցել է 105, «Ընդհանուր պատմությունից»' 6 և «Աշխարհագրությունից»` 40 շրջանավարտ: Ինչ-ինչ պատճառներով քննություններից բացակայած դիմորդներին հնարավորություն կտրվի կրկին մասնակցել քննության` իրենց ներկայացրած դիմումի և հատուկ տեղեկանքի դեպքում: Միասնական քննությունները կավարտվեն հունիսի 20-ին, իսկ մյուս քննությունները, որոնք հանձնում են աշակերտները յուրաքանչյուրն իր դպրոցում` հունիսի 24-ին:

Խոսելով քննության անցկացման կարգի մասին` Մկրտչյանը նշեց, որ այս տարի որևէ փոփոխություն չի եղել: Ըստ դպրոցների և ըստ առարկաների շրջանավարտների թիվը նախօրոք ներկայացվել է գնահատման և թեստավորման կենտրոն, և տվյալ առարկայի քննության օրը դպրոցները փակ ծրարներով ստացել են թեստերը: Քննությունների կազմակերպման ողջ գործընթացը գտնվում է մարզպետարանի կրթության վարչության հսկողության ներքո:

Արարատի մարզում 2013թ. պետական միասնական քննությունների մասնակցության դիմում-հայտ ներկայացրած շրջանավարտների թիվն այս տարվա համեմատ ավելի էր 86-ով` 897 շրջանավարտ: Նրանցից 755-ն ընդունվել են տարբեր բարձրագույն ուսումնական հաստատություններ: Բուհ ընդունված դիմորդներից 101-ն ընդունվել են անվճար, 651-ը` վճարովի և երեքը` արտոնյալ պայմաններով:

Արարատի մարզի դպրոցներում այս տարի շրջանավարտների թիվը 2261 է, որոնցից 394-ը ՀՀ ԿԳՆ ենթակայությամբ գործող մարզի 5 ավագ դպրոցների շրջանավարտներն են: 9-րդ դասարանն ավարտել են 3064 աշակերտ, որոնցից ավագ դպրոցների աշակերտները 107-ն են: