Ադրբեջանի իշխանությունները վախենում են Ռուսաստանից. ադրբեջանցի կուսակցապետ

Ադրբեջանի ընդդիմադիր «Մուսավաթ» կուսակցության առաջնորդ Իսա Ղամբարը հայտարարել է, որ ադրբեջանական իշխանությունները վախենում են Ռուսաստանից, ինչի համար էլ անհավասարակշիռ քաղաքականություն են տանում Արևմուտքի և Ռուսաստանի միջև: Այս մասին հայտնում է «Ենի Մուսավաթ» թերթը:

«Իշխանության ներկայացուցիչները սիրում են խաղալ բառերով. Վաշինգտոնում նրանք ասում են, որ Ադրբեջանը Մոսկվայի և Թեհրանի միջև «սենդվիչի» վիճակում է, իսկ Մոսկվայում էլ խոսում են Արևմուտքի երկակի չափանիշների մասին»,- թերթի հետ զրույցում է ասել է Ղամբարը:

Նրա կարծիքով` Ադրբեջանի իշխանությանը թվում է, թե դա հավասարակշռված քաղաքականություն է, այնինչ` դա կատարյալ անհեթեթություն է:

«Հավասարակաշռված քաղաքականությունն այն է, երբ պետությունը, ելնելով սեփական ազգային շահերից, խուսանավում է իր շահերի իրականացման հնարավորությունների հարցերում` հաշվի առնելով մյուս աշխարհաքաղաքական խաղացողներին: Բայց փորձել հավասարակշռել Արևմուտքի և Ռուսաստանի միջև, ձգտել Արևմուտքում դուր գալ նրանց քաղաքական էլիտային, իսկ Ռուսաստանում' ռուսաստանյան, դա բալանս չէ: Դա ուղղակի անհարգալից դրսևորում է սեփական պետության նկատմամբ: Երկրի ղեկավարությունը վախենում է տարբեր աշխարհաքաղաքական խաղացողներից' կախված այն բանից, թե ինչք ան ուժեղ են նրանք սպառնում երկրին: Դատելով ամեն ինչից, ռուսաստանյան և իրանական շրջանակների կողմից սպառնալիքներն ավելի լուրջ են: Իսկ Արևմուտքը գերադասում է մեղմ ներգործությունը: Դրա հետ միասին Արևմուտքն ընտրության հնարավորություն է տալիս: Նա չի սպառնում: Հենց այդ պատճառով էլ իշխանություններն ավելի շատ երկյուղում են Ռուսաստանից»,- ասել է նա:

Իսա Ղամբարի խոսքով` Ադրբեջանի իշխանությունները լավ են հասկանում, որ եվրոպական կառույցներ ինտեգրումը տնտեսական և քաղաքական բարեփոխումների իրագործում, համաշխարհային և եվրոպական չափանիշներին համապատասխանելիություն է պահանջում: «Եթե երկիրը գնա այդ ուղղությամբ, ապա իշխանությունն առաջինը կկորցնի իր կոռուպցիոն լծակները, երկրորդը` առաջին իսկ ընտրություններում նա կպարտվի»,- ամփոփել է ընդդիմադիր կուսակցապետը: