Մունդիալ-2014-ին ընդառաջ. ԳԱՆԱ

Ֆուտբոլի Գանայի ազգային հավաքականը նախորդ աշխարհի առաջնությունում, իսկապես, մեծ անականկալ մատուցեց թե’ համաշխարհային ֆուտբոլային հանրությանը, թե’ գանացիներին: Մունդիալ-2014-ը Գանայի համար կլինի երրորդ մասնակցությունը աշխարհի առաջնություններին: Եթե գանացիները գերազանցեն նախորդ ԱԱ-ում ցույց տված արդյունքը, ապա դա կլինի ոչ միայն առաջընթաց, այլ նաև նոր «մարտահրավեր» խաղահրապարակում:

Գանայի ֆուտբոլի ազգային թիմի առաջին մունդիալը 2006-ին էր: Գերմանական խաղադաշտերում անցկացված ԱԱ-ն, իսկապես որ մեկնարկային էր, նրանց հաջողվեց իրենց հաստատուն խոսքն ասել: Հայտնվելով E խմբում' «սև աստղերը» երեք խաղից հաղթելով երկուսում, երկրորդ տեղով դուրս եկան խմբից: Իսկ1/8 եզրափակիչում մրցելով աշխարհի հնգակի չեմպիոններ Բրազիլիայի ազգային հավաքականի հետ' խաղը զիջեցին 0-3 հաշվով: Չորս տարի անց գանացիները գերազանցեցին նախորդ առաջնության ձեռքբերումը: D խմբում առաջին տեղը զիջելով գերմանացիներին' «սև աստղերը» դուրս եկան խմբից: 1/8 եզրափակչում էլ հաղթելով ԱՄՆ-ի ֆուտբոլիստներին' դուրս եկան քառորդ եզրափակիչ: Այստեղ, սակայն, 11-մետրանոց հարվածներով պարտվեցին Ուրուգվայի հավաքականին:

Աշխարհի 20-րդ առաջնության խմբային փուլում Գանայի հավաքականի մրցակիցներն են Պորտուգալիայի, Գերմանիայի և ԱՄՆ-ի թիմերը:
Համաձայն վիճակագրության, Գանայի հավաքականի առավելությունը մրցակիցների նկատմամբ շատ խոսուն է: Յուրաքանչյուր խաղում «սև աստղերը» խփում են 1.55, իսկ սեփականն ընդունում 1 գնդակ: Անցկացրած 586 խաղերից գանացիները հաղթել են 280-ում, պարտվել' 162-ում և 144 հանդիպում ավարտել են խաղաղ ելքով: Աֆրիկյան հավաքականների մեջ Գանան 4-րդն է' զիջելով Կոտ դը Իվուարին, Եգիպտոսին, Ալժիրին: Աֆրիկյան երկրների գավա թի 15 խաղարկություններում, որոնց մասնակցել է այս թիմը, 4 անգամ հաղթող է դարձել:

Աֆրիկյան հավաքականի խաղային «բանալին» կարող է լինել Ասամոյա Ջանը, ով թիմի ավագն է և շարժիչ ուժը: Եվրոպական մակարդակի ֆուտբոլիստ է նաև Կեմին Պրինց Բոատենգը: Միշել Էսսին էլ հանդես է գալիս իտալական «Միլան»ում:

Գանայի հավաքականի կազմում Բրազիլիա կմեկնեն դարպասապահներ Ադամ-Լարսեն Կվարասին («Ստրյոմսգոդսետ», Նորվեգիա), Ֆատաու Դաուդան («Օռլանդո Պայրետս», Հարավային Աֆրիկա), Սթիվեն Ադամսը («Ադուանա Սթարզ»), պաշտպաններ Սամուել Ինկումը («Դնեպր», Ուկրաինա), Դենիել Օպարեն («Ստանդարտ», Բելգիա), Հարիսոն Աֆուլը («Էսպերանս», Թունիս), Ջեֆ Շլուպը («Լեսթեր», Անգլիա), Ջոն Բոյը («Ռեն», Ֆրանսիա), Ջերի Ակամինկոն («Էսկիշեհիրսպոր», Թուրքիա), Ռաշիդ Սումայլան («Մամելոդի Սանդաունզ», Հարավային Աֆրիկա), Ջոնաթան Մենս ան («Էվիան», Ֆրանսիա), կիսապաշտպաններ Սալի Մունտարին, Մայքլ Էսյենը (երկուսն էլ՝ «Միլան», Իտալիա), Վակասո Մուբարակը («Ռուբին», Ռուսաստան), Մոհամեդ Ռաբիուն («Կուբան», Ռուսաստան), Էմանուել Ագեմանգ-Բադուն («Ուդինեզե», Իտալիա), Էֆրիյի Ակվան («Պարմա», Իտալիա), Անդրե Այուն («Մարսել», Ֆրանսիա), Կվադվո Ասամոան («Յուվենտուս», Իտալիա), Կրիստիան Ատսուն («Վիտես», Հոլանդիա), Ալբերտ Ադոման («Միդլսբրո», Անգլիա), Դավիդ Ակամը («Հելսինբորգ», Շվեդիա), Կեւին-Պրինս Բոատենգը («Շալկե», Գերմանիա), հարձակվո ղներ Ջորդան Այուն («Սոշո», Ֆրանսիա), Ուորիս Մաջիդը («Վալանսյեն», Ֆրանսիա), Ասամոա Գյանը («Ալ Այն», ԱՄԷ): Գլխավոր մարզիչն է Ջեյմս Կվեսի Ապպիան:

ՖԻՖԱ-ի վարկանիշային աղյուսակում Գանայի ազգային թիմը 38–րդ հորիզոնականում է:

ՖՈՒՏԲՈԼԻ ԱՇԽԱՐՀԻ ԱՌԱՋՆՈՒԹՅԱՆ ՄԵԿՆԱՐԿԻՆ ՄՆԱՑԵԼ Է 6 ՕՐ: