Հալեպում կրկին հայ է զոհվել

Հալեպի հայկական Նոր Գյուղ թաղամասում հունիսի 1-ին գազի տակառի ընկնելու հետևանքով վիրավորված Լևոն Չերչյանը մահացել է: 1963թ.-ին ծնված Լևոն Չերչյանի հուղարկավորության արարողությունը տեղի կունենա այսօր՝ Հալեպի ժամանակով 13:00-ին, Հայ առաքելական ս. Աստվածածին եկեղեցում:

Հալեպի հայաշատ Նոր Գյուղ և Սուլեյմանիե թաղամասերում հունիսի 7-ին հրասանդների և հրթիռների ընկնելու հետևանքով զոհվել էր 1982թ.-ին ծնված Կարո Աստուրյանը: Բացի այդ, Սուլեյմանիե թաղամասում հրասանդներ ընկնելու հետևանքով վիրավորվել էին Հակոբ Սեմերջյանը և Պայծիկ Մելքոնյան-Չերչյանը: Տեղեկություններ կան, որ Պայծիկ Մելքոնյանի վիճակը մտագոհիչ չէ:

Հունիսի առաջին օրերից սկսած՝ Հալեպում և մասնավորապես հայկական Նոր Գյուղ թաղամասում, իրավիճակը կտրուկ վատացել է: Ահաբեկիչ խմբավորումների կողմից, որոնց կարևոր մասը թուրք կամ թուրքամետ արմատական ահաբեկչական խմբերն են, տարբեր տեսակի կործանարար հրթիռներ և հրասանդներ են տեղացել և կշարունակեն տեղալ խաղաղ բնակչության վրա: Հայկական Նոր գյուղ թաղամասում ընկած հրթիռները մարդկային վնասներից բացի, նյութական սարսափելի վնասներ են պատճառել: Նոր Գյուղում մեծաթիվ բնակարաններ բոլորովին անբնակելի են դարձել, իսկ հարյուրավոր բնակարաններ նորոգելու կարիք ունեն: Երբեմնի հայաշատ Նոր Գյուղ թաղամասն այսօր աղետալի շրջան է, ամայացած ու ավերակ: Նոր Գյուղը և հալեպահայությունը կործանման վտանգի առջև են կանգնել:

Կոչ է ուղղվել համայն հայությանը՝ բոլոր միջոցներով սատար կանգնելու ի նպաստ անմարդկային հրթիռաձգության կասեցման՝ հանուն աղետահար ժողովրդի ֆիզիկական անվտանգության ապահովման: