Հայաստանի ցանկությունները և իրականությունը

Մամուլում օրերս լուրեր տարածվեցին, որ Աստանայում դրսևորած Հայաստանի շտապողականությունը՝ ժամ առաջ մաս կազմել Եվրասիական միությանը, բացատրվում է այն հանգամանքով, որ ԵՏՄ հիմնադիր անդամը բավական լայն հնարավորություններ ունի, այդ թվում և վետոյի իրավունք՝ հետագա որևէ երկրի անդամակցության հետ կապված, ինչպես ՄԱԿ-ի ԱԽ-ում է. եթե որևէ երկիր չցանկանա, ապա թեկնածու երկիրը չի կարող որևէ հարց լուծել: Հայաստանը «շտապում» է, որ կարողանա վետոյի իր իրավունքն օգտագործել Ադրբեջանի անդամակցության հարցում կամ գոնե որոշակի պայմաններ թելադրի՝ վերապահումներ կիրառվեն, ինչպես վարվեց նույն Ղազախստանը: 

Այդ է պատճառը, որ Նազարբաևը և Լուկաշենկոն Պուտինի թույլտվությամբ հերթով բարձրացնում են Ղարաբաղի հարցը՝ հանուն Ադրբեջանի: Այնուհանդերձ, ինչպես տեղեկացրել է թերթի` Արտգործնախարարության աղբյուրը, հարցը փակված չէ, որովհետև ԵՏՄ-ն մեկնարկելու է 2015թ. հունվարի մեկից. ԵՏՄ համաձայնագիրը մինչ այդ բաց է, ավելին՝ Ղազախստանն ու Բելառուսը դեռ չեն վավերացրել այն, և այն երկիրը, որը մինչ այդ կմիանա համաձայնագրին, կհամարվի հիմնադիր անդամ:

Լուրեր.com-ի հետ զրույցում քաղաքական և ընտրական տեխնոլոգիաների փորձագետ Արմեն Բադալյանն` անդրադառնալով հարցին, թե որքանով է հավանական, որ Հայաստանը ԵՏՄ մտնելով, կկարողանա վետոյի իր իրավունքն օգտագործել Ադրբեջանի անդամակցության հարցում, ասաց, որ դա ընդհանրապես անհավանական է.

«Հայաստանը շատ բան կարող է ցանկանալ, բայց, ինչպես ցույց է տալիս պատմությունը, ցանկանալը քիչ է: 

Որքան էլ Հայաստանն Ադրբեջանից շուտ մաս կազմի Եվրասիական միությանը, միևնույնն է Հայաստանն այն պետությունը չէ, որ կարողանա ինքնուրույն որոշել Ադրբեջան-Եվրասիական միություն այդ հարաբերությունները:

Հայաստանը չունի արտաքին լուրջ քաղաքականություն և իր արտաքին քաղաքականությունը գտնվում է Ռուսաստանի ԱԳՆ-ի վերահսկողության ներքո: Եվ եթե Ադրբեջանը ցանկանա մտնել Եվրասիական միություն` այդ հարցը լուծելու են Բելառուսի, Ռուսաստանի, Ղազախստանի ղեկավարները, անկախ նրանից` Հայաստանը կլինի այդ միության անդամ, թե ոչ, Ադրբեջանից շուտ մտած կլինի, թե ուշ: Հայաստանն այն երկիրը չէ, որ կարողանա Ադրբեջանին խանգարել մտնել այդ միության մեջ»,- ասաց Բադալյանը: