Հայկական օգտատերերի համար ստեղծված թուրքական «Video I made for my friends» վիրուսի առեղծվածը

«Ֆեյսբուք» սոցիալական ցանցում տարածված «Video I made for my friends» հղումն ունի թուրքական ծագում և նախատեսված է միայն հայկական օգտատերերի համար: Այս մասին լրագրողների հետ հանդիպմանը տեղեկացրեց տեղեկատվական անվտանգության մասնագետ Սամվել Մարտիրոսյանը:

Նրա խոսքով, նշված վիրուսը եվրոպական երկրներում չկա, և դրա թուրքական լինելու մասին է վկայում այն կարևոր հանգամանքը, որ հղումով գնալու դեպքում օգտատերերն անկախ իրենց կամքից «լայքում» են թուրքական էջեր: «Միայն հղումի վրա «քլիք» անելիս վիրուսը չի փոխանցվում համակարգչին: Վիրուսը փոխանցվում է այն պարագայում, եթե օգտատերը կատարում է պահանջվող գործողությունները և ներբեռնում այն: Այս դեպքում համակարգիչ է ներթափանցում «Տրոյան» տեսակի վիրուսը, որը համակարգչից գողանում է տեղեկատվությունը` փոխանցելով այն թուրք հաքերներին: Ներկայումս յուրաքանչյուր երկրորդ օգտատեր վարակված է այս վիրուսով, սակայն դժվարանում եմ գնահատել, թե ինչ քանակի տեղեկատվություն է հոսել դեպի թուրքական հաքերների ձեռքը»,- ասաց Մարտիրոսյանը:

Նա նշեց, որ վարակվածների մեծ մասն այն օգտատերերն են, ովքեր չեն ունեցել հակավիրուսային ծրագրեր, իսկ մյուս մասն էլ նրանք են, ովքեր անջատել են անտիվիրուսը, որպեսզի համակարգիչն արագ աշխատի: Սակայն կա նաև այլ խնդիր, քանի որ որոշ հակավիրուսային ծրագրեր, ինչպիսիք են SimanTech-ը և Doctor Web-ը, չեն որսում այդ վիրուսը: