Ֆրանսիան և Իրանը երկկողմ բանակցություններ կվարեն Թեհրանի միջուկային ծրագրի շուրջ

Ֆրանսիան և Իրանը հունիսի 11-ին երկկողմ բանակցություններ կվարեն Թեհրանի միջուկային ծրագրի շուրջ: Այդ մասին հունիսի 10-ին հաղորդել է Agence France-Presse-ը՝ հղում անելով Ֆրանսիայի արտաքին գործերի նախարար Լորան Ֆաբիուսին:

«Ֆրանսիայի և Իրանի միջև երկկողմ քննարկումները կկայանան չորեքշաբթի»,- հայտարարել է Ֆաբիուսը նախօրյակին Ալժիրում կայացած մամուլի ասուլիսում:

Հունիսի 9-ին Ժնևում ավարտվել է իրանական միջուկային ծրագրի շուրջ ԱՄՆ-ի, Իրանի և Եվրամիության երկօրյա կոնսուլտացիաների առաջին օրը: Դրանցում Թեհրանը ներկայացնում է արտաքին գործերի փոխնախարար Աբաս Արաքչին, ամերիկյան կողմը՝ պետքարտուղարի առաջին տեղակալ Ուիլյամ Բյոռնսը և ԱՄՆ-ի պետքարտուղարի՝ քաղաքական հարցերով տեղակալ Ուենդի Շերմանը, իսկ Եվրամիությունը՝ Քեթրին Էշթոնը և նրա տեղակալ Հելգա Շմիդտը: Հանդիպումները կվերսկսվեն հունիսի 10-ի առավոտյան և, ինչպես սպասվում է, կշարունակվեն մինչև երեկո: Իրան-ԵՄ-ԱՄՆ եռակողմ բանակցություններից հետո Հռոմում տեղի կունենան Իրանի և Ռուսաստանի ներկայացուցիչների երկկողմ բանակցությունները:

Կոնսուլտացիաներն ընթանում են Իրանի և միջազգային միջնորդների «վեցյակի» (Ռուսաստան, ԱՄՆ, Մեծ Բրիտանիա, Չինաստան, Գերմանիա և Ֆրանսիա) բանակցությունների նախաշեմին, որոնց հերթական փուլը նշանակված է հունիսի 16-ին Վիեննայում: Բանակցությունների նպատակն արևմտյան երկրների համար իրանական միջուկային ծրագրի թափանցիկության ապահովման և դրանից հնարավոր ռազմական բաղադրիչի բացառման շուրջ վերջնական համաձայնության հասնելն է' տնտեսական պատժամիջոցների վերացման դիմաց, հաղորդել է ՌԻԱ Նովոստին: