ԱԺ ՀՀԿ խմբակցության ղեկավարն անդրադարձել է քառյակի հայտարարությանը

Ոչ իշխանական քառյակի ներկայացրած առաջարկներն ողջամիտ են և կարող են ԱԺ մեծամասնության քննարկման առարկա դառնալ: Այս մասին Ազգային ժողովում լրագրողների հետ զրույցում նշեց ԱԺ ՀՀԿ խմբակցության ղեկավար Վահրամ Բաղդասարյանը: «Ես վստահ էի, որ նրանք այնպիսի առաջարկներ կներկայացնեն, որոնք մեր քննարկման առարկան կդառնան: Ներկայացված առաջարկներն արդեն մեր կողմից հնչել էին, մի մասը կառավարության ծրագրում, մյուս մասը մեր ելույթների ժամանակ: Ներկայացված բոլոր առաջարկություններն էլ քննարկման առարկա են»,- ընդգծեց Բաղդասարյանը:

Անդրադառնալով քառյակի առաջին պահանջին՝ վերացնել կուտակային կենսաթոշակների մասին օրենքի պարտադիր բաղադրիչը, Բաղդասարյանը նշեց, որ այդ օրենքի դրույթների վերանայման հետ կապված լուրջ գործընթացներ են ընթանում, և առաջընթաց կա: «Շատ լուրջ բանակցությունների արդյունքում մենք եկանք մի այնպիսի եզրակացության, որ, իրոք, այդտեղ վերանայման խնդիր կա»,- նկատեց ՀՀԿ խմբակցության ղեկավարը:

Ճանապարհային տեսանկարահանող սարքերի և վճարովի ավտոկանայանատեղիների վերաբերյալ քառյակի պահանջների մասին Վահրամ Բաղդասարյանը նշեց, որ այդ հարցերի վերբերյալ լսումներ են կազմակերպվել և այդ հարցն էլ պետք է մանրամասն ուսումնասիրվի, քանի որ այն օրակարգային է:

Անդրադառնալով շրջանառության հարկն առնվազն 3 անգամ նվազեցնելու առաջարկին` ՀՀԿ խբակցության ղեկավարը հիշեցրեց, որ շրջանառության հարկի մասին իրենք են բարձրաձայնել, ավելի լավ առաջարկություններով հանդես եկել:

Իսկ այն դիտարկմանը, թե ստացվում է, որ քառյակն իշխանության ներկայացրած կետերն է առաջարկում, Վահրամ Բաղդասարյանն այսպես արձագանքեց. «Դրա համար էլ շատ ուրախ եմ: Ես ասում եմ, որ ողջամիտ առաջարկություններ են արվել ընդդիմության կողմից, և սա արդեն այն ընդդիմությունն է, որը մենք ուզում ենք տեսնել, և ում հետ կկարողանանք հարցեր քննարկել, հարցեր լուծել»: Նա նկատեց, որ քառյակի կողմից այնպիսի հարցեր են բարձրաձայնված, որոնք քննարկման առարկա կարող են դառնալ կամ արդեն դարձել են:

Դիտարկմանը, թե ՀՀ նախագահ Սերժ Սարգսյանը, երբ ներկայացնում էր նոր վարչապետին, ասում էր, որ նա պետք է ընդունելի լինի բոլորի կողմից, Բաղդասարյանը պատասխանեց, որ սա հենց դրա վկայությունն է: «Գյուղատնտեսության հետ կապված բոլոր առաջարկություններն ընդգրկված են մեր ծրագրի մեջ»,- նկատեց նա:

Բաղդասարյանը դեմ է ընդդիմությանը վերահսկողության մեխանիզմներ տալու մասին քառյակի առաջարկին՝ ընդգծելով, որ ընդդիմությունն առանց պատասխանատվություն վերցնելու իր վրա, վերահսկողական գործառույթներ է պահանջում: «Ես դեմ եմ նման բաների: Երբ որ կլինի առողջ ընդդիմություն և քաղաքական ընդդիմություն, կարող է քննարկվել, բայց այս պարագայում` ոչ»,- ասաց նա:

Անդրադառնալով քառյակի հայտարարության վերջին կետին՝ չկնքել այնպիսի միջազգային պայմանագիր, որը կբաժանի Հայաստանը և Լեռնային Ղարաբաղը, Բաղդասարյանը նշեց, որ Հայաստանը երբեք չի կնքի պայմանագիր, որը կխանգարի Հայաստանի և Ղարաբաղի հարաբերություններին:

Նա պատասխանեց նաև ՀԱԿ խմբակցության ղեկավար Լևոն Զուրաբյանին, ով քառյակի պահանջների հրապարակումից հետո հայտարարել էր, թե Սերժ Սարգսյանի չար ծառից բարի պտուղներ հնարավոր չէ սպասել: «Իսկ չար մարդուց ի՞նչ եք սպասում ընդհանրապես: Տեսնում եք' բոլոր նման հայտարարությունները փչացնում են այս 12 կետերում ամրագրված առաջարկները: Եթե դու չես սպասում, էլ ինչի՞ համար ես նման առաջարկներ ներկայացնում: Գնացեք ձեր գործը փողոցում արեք այդ դեպքում: Եթե քառյակը նստել, աշխատել է ամիսներով, որպեսզի սա անի և, եթե արել է, ու սպասելիք չունի' ես այդպիսի մարդու տրամաբանությունը չեմ հասկանում»,- շեշտեց ՀՀԿ խմբակցության ղեկավարը:

Ազգային ժողովի ոչ իշխանական քառյակը ներկայացրել է 12 կետից բաղկացած առաջարկները, որոնցով շեշտադրված են երկրում փոփոխություններ իրականացնելու մի շարք պահանջներ: Մասնավորապես, քառյակը պահանջում է վերացնել կուտակային կենսաթոշակների մասին օրենքի պարտադիր բաղադրիչ, վերանայել ճանապարհային տեսանկարահանող սարքերով որոշվող տուգանքների ու ավտոկայանատեղերի համակարգը, նվազեցնել շրջանառության հարկի դրույքաչափերն առնվազն երեք անգամ, խթանել մարզերում փոքր ու միջին բիզնեսը, առնվազն կրկնապատկել գյուղմթերքների արտադրության, ոռոգման ջրի ու վարկերի համար տրամադրվող սուբսիդիաների ծավալները, գյուղատնտեսությունում տրված արտարժութային վարկերը վերածել դրամայինի, գործող տրանսպորտային համակարգում բացառել հանրային տրանսպորտի փոխադրավարձի բարձրացումը: