Իշխող մեծամասնության համար քառյակի բարձրացրած հարցերը նորություն չեն

Ազգային ժողովի ՀՀԿ խմբակցության ղեկավար Վահրամ Բաղդասարյանը հավաստիացնում է, որ խորհրդարանական քառյակի ներկայացրած 12 կետերն արդեն քաղաքական մեծամասնության ուշադրության կենտրոնում են: «Շատ ուրախ եմ, որ վերջապես շատ առողջ առաջարկություններ են արվել, և դրանք մենք քննարկման առարկա կդարձնենք: Ինձ թվում է` նշված բոլոր կետերը մենք արդեն իսկ ներկայացրել ենք թե կառավարության ծրագրի քննարկման ժամանակ, թե մեր ելույթներում»,- ասաց պատգամավորը:

Հերթով անդրադառնալով 12 պահանջներին` Վահրամ Բաղդասյանը նշեց. «Պարտադիր բաղադրիչը վերացնելու մասով` արդեն գիտեք, որ բավականին լուրջ գործընթաց է գնում, առաջընթաց կա: ՀՅԴ խմբակցության և մյուս քաղաքական ուժերի հետ բանակցությունների արդյունքում մենք եկանք այնպիսի եզրահանգման, որ իրոք վերանայման կարիք կա: Հաջորդը` վերանայել տեսանկարահանող և կարմիր գծերի համակարգը, մեկ անգամ լսումներ կազմակերպեցինք այդ թեմայով, պատրաստ ենք երկրորդ անգամ էլ կազմակերպել, պետք է ուսումնասիրվի դրա վերահսկելիությունը: Մենք չենք ժխտում, որ խնդիրը կա: Այսինքն` սա օրակարգային հարց է: Ես չեմ ասում, որ մենք նրանց բոլոր պահանջները կբավարարենք, բայց պետք է նայենք, թե որ խնդիրն է համապատասխանում իրականությանը, մենք դեմ չենք լինի դրանց անդրադառնալ»:

ՀՀԿ խմբակցության ղեկավարի խոսքով` շրջանառության հարկի մասին հարցը հենց իրենք են ներառել կառավարության ծրագրում և հետագայում էլ ավելի նպաստավոր առաջարկություններով են հանդես գալու: «Իրոք շրջանառության հարկը պետք է վերանայվի, մենք այնտեղ ավելի լավ առաջարկություններով հանդես կգանք: Որոշ մասի նկատմամբ կվերացվի շրջանառության հարկը, դրանից հետո փաստաթղթավորման դեպքում չի բացառվում, որ շրջանառության հարկի շեմը բարձրացվի, բայց տոկոսն իջնի: Գյուղատնտեսության ոլորտի հետ կապված բոլոր առաջարկություններն ընդգրկված են մեր ծրագրում: Դա մենք ենք առաջարկել' թե ոռոգման ջրի հետ կապված, թե վարկերի, որ պետք է հասնելի լինեն գյուղացուն»,- ասաց Վահրամ Բաղդասարյանը` ընդգծելով, որ արված առաջարկություններն առողջ են: «Ես ասում եմ, որ շատ առողջ առաջարկություններ են արվել ու գալիս է այն կոնստրուկտիվ ընդդիմությունը, որը մենք ուզում ենք, որոնց հետ կկարողանանք հարցեր քննարկել: Բարձրացված հարցերը պրակտիկ են, որոնք մեր քննարկման առարկան պետք է դառնան կամ արդեն դարձել են»,- հավելեց նա:

Վահրամ Բաղդասարյանը նշեց, որ բարձրացված հարցերի մի մասին պետք է օրենսդրական մակարդակով անդադառնալ, մյուս մասին' կառավարության որոշումներով:

Ինչ վերաբերում է քառյակի կողմից իշխանությանը տրված ժամանակահատվածին, որ մինչ սեպտեմբերի վերջ պետք է նշված պահանջները կատարվեն` Վահրամ Բաղդասարյանն ասաց, որ իրենք կառավարությանը պետք է հարցապնդում անեն, որպեսզի ծրագրի իրականացման ժամկետները հստակեցվեն: «Մենք նախապայմաններին չենք նայում, այլ առաջարկություններին: Եթե իրենք սեպտեմբերն են նշում վերջնաժամկետ, բայց դրանք մայիսի կարող են կատարվել, թող իրենք անեն իրենց քայլերը»,- նշեց ՀՀԿ-ական պատգամավորը:

Անդրադառնալով ընդդիմությանը վերահսկողական ֆունկցիաներ տալու պահանջին` Վահրամ Բաղդասարյանը նշեց` դեմ է, որ առանց իր վրա պատասխանատվություն վերցնելու, ընդդիմությունը ստանա վերահսկողական ֆունկցիաներ: «Մենք բազմիցս հայտարարել ենք` երբ ընդդիմությունը կլինի առողջ և այն կլինի քաղաքական ընդդիմություն, մենք այդ հարցին էլ կանդրադառնանք»,- ավելացրեց նա:

Քառյակի հայտարարության մեջ ներառված վերջին կետի առնչությամբ էլ, ըստ որի իշխանությունը չստորագրի որևէ միջազգային համաձայնագիր, որով Հայաստանի և ԼՂՀ միջև կնախատեսվի հաստատված հարաբերությունների, ներառյալ միասնական տնտեսական ռեժիմի փոփոխություն, Վահրամ Բաղդասարյանը հավաստիացրեց, որ ոչ մի դեպքում Հայաստանի Հանրապետությունը չի կնքի պայմանագրեր, համաձայնագրեր, որոնք կխաթարեն Հայաստանի ու Ղարաբաղի հարաբերությունները: