«Հրապարակ». «Ավելի հեշտ կլինի այդ ուժերի «օձիքից» բռնելն ու հարցնելը՝ սա դուք չե՞ք գրել»

Երեկ ԱԺ 4 խմբակցությունները վերջապես հրապարակեցին բազմաչարչար 12 կետերը: Ոմանք հիասթափվեցին, ոմանք՝ ոգեւորվեցին, ծանոթանալով դրանց: ՀՀԿ պոռոտախոսները սկսեցին հեգնել, թե մենք այդ ամենն արդեն անում ենք, մեզ հետ ուլտիմատումներով չի կարելի խոսել, իշխանություն եւ լծակներ են ուզում՝ թող ընտրություններում հաղթեն եւ այլն: Իսկ ոչ իշխանական ուժերն ավելի քան կոռեկտ են իրենց քայլերում եւ հայտարարություններում:

Ի վերջո, երբ ընտրական մեխանիզմները ոչնչացված են, եւ իշխանությունների՝ վերարտադրվելու հավանականությունը մոտ է 100 տոկոսի, ի՞նչ է մնում անել իշխանության մեջ չգտնվող ուժերին, եթե ոչ հայտարարություններ անել, ցույց տալ իշխանության սխալները եւ պահանջել, որ դրանք շտկվեն: Ահա քառյակը հրապարակել է իր սկզբունքները. «Հայաստանի ինքնիշխանությունը, ԼՂՀ անկախությունը, անվտանգության ապահովումը, հիմնահարցի խաղաղ եւ արդարացի կարգավորումը գերակա սկզբունքներ են: Այս հարցերում անթույլատրելի է որեւէ նահանջ, իսկ ընդունվելիք որոշումները պետք է լինեն բացառապես հանրության եւ խորհրդարանի մասնակցությամբ»: Սա, իհարկե, չի նշանակում, որ վաղը «Բարգավաճ Հայաստանի» մի ներկայացուցիչ չի հայտարարելու, թե Մաքսային միությունն ու Եվրասիական տնտեսականը մեր միակ փրկությունն են, իսկ Պուտինը բոլոր ժողովուրդների հայրն է:

Բայց երբ ինքնիշխանության սկզբունքն ամրագրված է, իսկ 12-րդ կետով հստակ սահմանված պահանջ կա. «Չստորագրել որեւէ միջազգային համաձայնագիր, որով Հայաստանի եւ ԼՂՀ միջեւ կնախատեսվի հաստատված հարաբերությունների, ներառյալ միասնական տնտեսական ռեժիմի փոփոխություն», ավելի հեշտ կլինի այդ ուժերի «օձիքից» բռնելն ու հարցնելը՝ սա դուք չե՞ք գրել: Բարի եղեք հավատարիմ մնալ ձեր իսկ հայտարարած սկզբունքներին:

Շարունակությունը` «Հրապարակ»-ի այսօրվա համարում: