Պատերազմի վերսկսումն Ադրբեջանի համար ողբերգական և կործանարար կլինի. Արկադի Տեր-Թադևոսյան

«Գեղարեգ» կրթամշակութային հասարակական կազմակերպության հրավերով Գավառ քաղաքում էր գտնվում Արցախյան ազատամարտի հերոս, լեգենդար հրամանատար, գեներալ-մայոր Արկադի Տեր-Թադևոսյանը' հայտնի Կոմանդոսը, ով «Պատիվ ունեմ…» ռազմահայրենասիրական ծրագրի շրջանակներում հանդիպեց «Գեղարեգի» նժդեհիկների հետ: Հանդիպումից հետո գեներալը պատասխանեց նաև «Արմենպրես»-ի հարցին.

Հարց - Պարո′ն գեներալ, քանի դեռ կաք Դուք և Ձեզ նման հռչակված, հաղթանակներ կռած հերոս հրամանատարներ ու զինվորներ, Հայոց բանակի առջևից լեղապատառ փախած թշնամին կհանդգնի՞, արդյոք, իրականություն դարձնել իր սպառնալիքները:

Պատասխան-Ոչ, չի հանդգնի: Ես հավատացած եմ, որ ադրբեջանցի ժողովուրդը լավ է հասկանում, թե իր համար ինչպիսի աղետ կլինի պատերազմի վերսկսումը: Մենք էլ լավ ենք հասկանում, որ Ադրբեջանի թիկունքում նրա ավագ եղբայր Թուրքիան է, որ ալիևյան կլանը տիրապետում է նավթադոլարներից ստացված ահռելի եկամուտների, բայց դա մեզ չի վախեցնում: Բնական է, որ պատերազմի վերսկսումը մեզ համար կուղեկցվի ցավալի մարդկային կորուստներով, բայց մեր թշնամու համար այն կլինի ողբերգական և կործանարար: Հաստատ, դա կլինի նրա վերջը: Իսկ քանի կա Հայոց մարտական բանակը, հայ ժողովուրդն այլևս չի տեսնի 1915 թվականի պես արհավիրք, չի ունենա տարածքային ցավագին կորուստներ, թշնամին մեզնից չի կարողանա խլել ո’չ Արցախը, ո’չ Սևանա լիճը և նրա ավազանը, ո’չ էլ մնացած տարածքները, որոնց հանդեպ միշտ էլ զավթողական նկրտումներ ունի:

Խոսրով Խլղաթյան