Երգչուհի Սառա Բրայթմանը 52 մլն դոլար կվճարի «Սոյուզ»-ով Միջազգային տիեզերակայան թռչելու համար

Ռուսական «Սոյուզ» տիեզերանավով թռիչքը և տասն օր Միջազգային տիեզերակայանում մնալը բրիտանացի երգչուհի Սառա Բրայթմանի վրա կնստի 52 միլիոն դոլար: Այս մասին հայտնել է Space Adventures ընկերության նախագահ Թոմ Շելլին, որը, ըստ «Ռոսկոսմոսի» հետ ձերք բերված համաձայնության՝ զբաղվում է «տիեզերական զբոսաշրջիկների» ճանապարհորդությունների կազմակերպմամբ:

Նրա խոսքով՝ Բրայթմանը հույս ունի Միջազգային տիեզերակայան ուղևորվել 2015 թվականի սեպտեմբերին և արդեն առաջիկա աշնանը կայցելի Մոսկվայի մարզի Տիեզերագնացների պատրաստման կենտրոն, որտեղ կանցնի բազմամսյա վարժանքներ:

«Նա այս գաղափարով է համակված ամբողջ 100 տոկոսով և այժմ կազմում է վերջնական պլանները»,-հավաստիացրել է Շելլին՝ ելույթ ունենալով Ֆլորիդայի նահանգի Ազգային տիեզերական ակումբում (Ֆլորիդայի Քանավերալի հրվանդանում է գտնվում NASA-ի գլխավոր տիեզերադաշտը): Նա հավաստել է, որ Բրայթմանը ցանականում է դառնալ պատմության մեջ առաջին պրոֆեսիոնալ երգչուհին, որը կկարողանա լինել տիեզերքում և այնտեղ կատարել որևիցե կոմպոզիցիա, հաղորդել է ԻՏԱՌ-ՏԱՍՍ-ը: