ՀՀ նախագահն ԱԺ էր վերադարձրել «Պետական պաշտոններ զբաղեցնող անձանց վարձատրության մասին» օրենքում լրացումներ կատարելու մասին» օրենքը

Ազգային ժողովը երկրորդ ընթերցմամբ և ամբողջությամբ ընդունեց «Պետական պաշտոններ զբաղեցնող անձանց վարձատրության մասին» ՀՀ օրենքում փոփոխություններ և լրացումներ կատարելու մասին օրենքի նախագիծը: Ընդունվեցին նաև հարակից օրենսդրական նախագծերը: Օրենսդրական փաթեթին կողմ քվեարկեց 63, դեմ՝ 24, ձեռնպահ՝ 16 պատգամավոր:

«Արմենպրես»-ի հարցին ի պատասխան, թե ինչու է ՀՀ նախագահը հունիսի 10-ին առարկությամբ ՀՀ Ազգային ժողով վերադարձրել «Պետական պաշտոններ զբաղեցնող անձանց վարձատրության մասին» ՀՀ օրենքում լրացումներ կատարելու մասին» ՀՀ օրենքը, ՀՀ նախագահի աշխատակազմից տեղեկացրին, որ նկատի առնելով, որ Ազգային ժողովի հինգերորդ գումարման հինգերորդ նստաշրջանի ընթացիկ քառօրյայում նախատեսվել էր ԱԺ կողմից 2014 թվականի մայիսի 19-ին ընդունված «Պետական պաշտոններ զբաղեցնող անձանց վարձատրության մասին» ՀՀ օրենքում փոփոխություններ և լրացումներ կատարելու մասին» ՀՀ օրենքի նախագծի երկրորդ ընթերցմամբ քվեարկությունը, Նախագահը «Պետական պաշտոններ զբաղեցնող անձանց վարձատրության մասին» ՀՀ օրենքում լրացումներ կատարելու մասին» ՀՀ օրենքի ստորագրումը նպատակահարմար չի համարել և հիմք ընդունելով ՀՀ Սահմանադրության 55-րդ հոդվածի 2-րդ կետի երկրորդ պարբերությունը' առարկությամբ վերադարձրել է ՀՀ Ազգային ժողով:

«Արմենպրես»-ի հետ զրույցում հիմնական զեկուցող, ՀՀ աշխատանքի և սոցիալական հարցերի նախարար Արտեմ Ասատրյանը պարզաբանեց, որ այսօր ընդունված փաթեթը թույլ կտա զերծ մնալ իրավական խնդիրներից, միևնույն ժամանակ առաջացած խնդիրները ամբողջությամբ կարգավորել մեկ նախագծով: Նա նշեց, որ Ազգային ժողովում ներկայացված էին տարբեր օրենսդրական փաթեթներ, որոնք վերաբերում էին նույն օրենքում փոփոխություններ կատարելու վերաբերյալ նախագծին: «Ազգային ժողովն արդեն ընդունել էր քննչական կոմիտեի մասին օրենքը հարակից օրեն քներով, որոնց մեջ էր նաև պետական պաշտոններ զբաղեցնող անձանց վերաբերող օրենքում փոփոխություններ կատարելու նախագիծը: Եվ այդ նույն օրենքում առանձին ներկայացված էր փոփոխություններ կատարելու մեկ այլ նախագիծ` կրկին փաթեթով, որը պետք է քվեարկվեր երկրորդ ընթերցմամբ: Քանի որ այս երկու տարբեր փաթեթներում ընդգրկված նախագծերը նույն օրենքի նույնիսկ նույն հոդվածում փոփոխություններ էին ենթադրում, այստեղ դրանք միացնելու խնդիր կար, քանի որ դրանք երկուսն էլ ուժի մեջ էին մտնելու 2014թ. հուլիսի 1-ից: Հետևաբար նաև այս իրավական խնդիրներից զերծ մնալու համար միևնույն ժամանակ առաջացած խնդիրները ամբողջությամբ մեկ նախագծով կարգավորելու համար Ազգային ժողովը քվեարկեց արդեն միավորված նախագծի օգտին»,- ասաց նախարարը: