«Հայոց լեզու և գրականություն» միասնական քննությունից 20 է ստացել 114 դիմորդ

Հանրապետության բոլոր քննական կենտրոններում հունիսի 6-ին անցկացված «Հայոց լեզու և գրականություն» առարկայի միասնական քննությանն այս տարի մասնակցել է 7 հազար 328 դիմորդ: Ինչպես «Արմենպրես» -ի թղթակցի հետ զրույցում նշեց Գնահատման և թեստավորման կենտրոնի արտաքին համագործակցության բաժնի պետ Արա Իսպիրյանը, քննության միջին միավորն այս տարի եղել է 13, 24-ը:

«Անբավարար է ստացել դիմորդների 9,5 տոկոսը: Այս տարի առավելագույն' 20 միավոր է ստացել 114 դիմորդ»,-նշեց Իսպիրյանը:

ԳԹԿ արտաքին համագործակցության բաժնի պետն ընդգծեց, որ քննության արդյունքների բողոքարկումը տեղի կունենա վաղը, ընդ որում' որևէ բովանդակային հարցի շուրջ բողոքարկում դժվար թե իրականացվի, որովհետև թեստերում վրիպակներ չեն եղել: «Նախորդ տարվա հետ համեմատած' այս տարի որևէ էական փոփոխություն չի եղել: Միջին միավորը նախորդ տարի 13-ն էր, իսկ անբավարար էին ստացել մոտավորապես 1,5 տոկոսով ավելի քիչ դիմորդներ»,-հավելեց Արա Իսպիրյանը:

Հանրապետությունում միասնական քննությունները մեկնարկել են հունիսի 2-ից' «Կենսաբանություն», «Աշխարհագրություն» և «Ընդհանուր պատմություն» առարկաներից: Այդ քննություններին մասնակցել էին շուրջ 1800 դիմորդներ: «Հայոց լեզու և գրականություն» միասնական քննությանը հունիսի 6-ին մասնակցել է նաև ՀՀ կրթության և գիտության նախարար Արմեն Աշոտյանը: Արմեն Աշոտյանը զրուցեց նաև ծնողների հետ և վստահեցրեց, որ քննությունները կանցկացվեն բարձր մակարդակով, և խնդիրներ չեն առաջանա: