Պետական տոների ցանկում կառավարությունն առաջարկում է ամրագրել Մայր բուհի հիմնադրման օրը

Երևանի պետական համալսարանի 95-ամյակին նվիրված տոնական միջոցառումների շարքում հունիսի 11-ին տեղի է ունեցել ԵՊՀ գիտխորհրդի հանդիսավոր նիստ, որի օրակարգում ընդգրկված են եղել բացառապես շնորհավորանքներ ու պարգևատրումներ: Բուհի մեծ դահլիճում անցկացված հանդիսավոր նիստին մասնակցել են ՀՀ փոխվարչապետ Արմեն Գևորգյանը, ՀՀ կրթության և գիտության նախարար Արմեն Աշոտյանը, Հայ Առաքելական եկեղեցու Արարատյան հայրապետական թեմի առաջնորդական փոխանորդ Նավասարդ արքեպիսկոպոս Կճոյանը, Հայաստանում տարբեր երկրների դեսպաններ, տարբեր բուհերի ռեկտորներ, արտասահմանյան հյուրեր, ԵՊՀ պրոռեկտորներ, դեկաններ, դասախոսներ, աշխատակիցներ ու ուսանողներ:

Հանդիսավոր նիստի սկզբում ՀՀ և ԵՊՀ օրհներգերին հաջորդել է Տերունական աղոթքը՝ այդ կերպ ազդարարելով նիստի բացումը: Ամենայն Հայոց կաթողիկոսի՝ Մայր բուհին ուղղված շնորհավորական ուղերձը ներկայացրել է Նավասարդ արքեպիսկոպոս Կճոյանը, ՀՀ վարչապետ Հովիկ Աբրահամյանի ուղերձն էլ ընթերցել է փոխվարչապետը: «Համալսարանը, հանդիսանալով հայոց նորագույն պատմության առաջին բարձրագույն գիտակրթական հաստատությունը, Հայաստանի արդի բուհական համակարգի հիմքերն է դրել: Բազմաբնույթ կրթական և հետազոտական ծրագրերի իրականացմամբ, պրոֆեսորադասախոսական անձնա կազմի բարձր արհեստավարժությամբ, միջազգայնացման գործընթացի ընդլայնվող միտումների շնորհիվ համալսարանն անվերապահորեն համարվում է մեր երկրի գիտական, մշակութային համակարգի ձևավորման գլխավոր դարբնոցը»,-նշված է եղել ՀՀ վարչապետի ուղերձում:

«Շնորհակալ եմ համալսարանի ուսանողներին ու դասախոսներին, որ նրանք եղել են ու կան մեր պատմության մեջ: Ես համալսարանական չեմ, սակայն, կարծում եմ, որ յուրաքանչյուր կիրթ և հայրենասեր մարդ իրեն պիտի մի քիչ համալսարանական զգա: ԵՊՀ ուսանողական խորհուրդը առաջարկություն էր ներկայացրել մայիսի 16-ը ներառել պետական տոների շարքում և հռչակել երիտասարդության ու ուսանողների օր: Ուրախությամբ ուզում եմ ասել, որ այդ առաջարկն ընդունվել է, և ՀՀ Կառավարությունը ԱԺ-ին է ներկայացրել մի օրինագիծ, որով տոների ցանկում առաջարկվում է ամրագրել նաև Մայր բուհի հիմնադրման օրը»,- շնորհավորական ելույթում նշել է ԿԳ նախարար Արմեն Աշոտյանը: