Փոխվարչապետը հորդորում է տեղյակ պահել կենսաթոշակայինի մասով օրենքը խախտող գործատուների մասին

Տարածքային կառավարման նախարար, փոխվարչապետ Արմեն Գևորգյանը Ազգային ժողովի ամբիոնից հավաստիացրեց, որ «Կուտակային կենսաթոշակների մասին» օրենքում կատարված փոփոխությունները, առ այն, որ աշխատողը կարող է դիմել գործատունին և հրաժարվել պարտադիր կուտակային վճարից, կիրառվելու է: Փոխվարչապետը խնդրին անդրադարձավ' ի պատասխան ԱԺ ՀՅԴ խմբակցության քարտուղար Աղվան Վարդանյանի հարցին: «ՀՀ օրենքով մեր քաղաքացիներն իրավունք ունեն դիմել գործատունին և հրաժարվել պարտադիր կուտակային վճարներից, առաջարկում եմ այս ամբիոնից մեկ անգամ ևս հայտարարել, որ և պետական, և մասնավոր հատվածում այն գործատուները, ովքեր բացահայտ կամ թաքուն խոչընդոտում են քաղաքացիների իրավունքների իրականացումը, պատասպանատվություն պետք է կրեն օրենքի առաջ»,-ասաց Աղվան Վարդանյանը:

«Խնդիրն արդեն մեր ուշադրության կենտրոնում է, մենք էլ ահազանգեր ստացել ենք կառավարությունում, որոնց նկատմամբ արդեն միջոցառումներ ձեռնարկվում են: Ուզում եմ բոլորին հավաստիացնել, որ օրենքը կիրառվելու է և եթե լինեն դեպքեր, խնդրում ենք տեղեկացնել մեզ: Ամեն դեպքում որևէ հակառակ ցուցում որևէ ատյանից չի գնացել ու չի էլ կարող լինել»,-ասաց Արմեն Գևորգյանը:

Աղվան Վարդանյանը նաև խնդրեց տրամադրել տվյալներ 1971 թվականից հետո ծվածների մասին, ովքեր աշխատում են, ինչպես նաև նրանց ներկարացրած դիմումների թվաքանակի վերաբերյալ տեղեկատվություն: Ինչին ի պատասխան Արմեն Գևորգյանը նշեց. «Մենք քննարկան առարկա կդարձնենք ձեր առաջարկությունը: Հաշվի առնելով, որ նմանատիպ վիճակագրություն չի վարվում, ըստ նպատակահարմարության կտեղեկացնենք ձեզ»: