«Հրապարակ». Բաքվում տեղի կունենա ՆԱՏՕ-ի «Ռոս-Ռոութ» սեմինարը. Ռուսաստանին դուր կգա՞ մեր մասնակցությունը

Հունիսի 16-18-ը Բաքվում տեղի ունենալիք ՆԱՏՕ-ի «Ռոս-Ռոութ» սեմինարին Հայաստանից կմասնակցեն ԱԺ պաշտպանության, ՆԳ, ԱԱ հարցերով մշտական հանձնաժողովի նախագահ Կորյուն Նահապետյանը եւ «Ժառանգությունից»՝ Թեւան Պողոսյանը: Մեկնելո՞ւ եք՝ հարցրինք Կորյուն Նահապետյանին։ «Այս պահի դրությամբ դեռ վերջնական որոշում չկա. սպասում ենք անվտանգության երաշխիքների հետ կապված հավաստումներին, այսօր ՆԱՏՕ-ի վեհաժողովի քարտուղարության կողմից տեղեկացրել են, որ, նախնական տվյալներով, Ադրբեջանն ասել է, որ կտրամադրեն անվտանգության միջոցներ. սպասում ենք վերջնական պատասխանին»: Վախենո՞ւմ եք: «Մե՞նք: Երբեք»: Փորձում եք օլիմպիական մասնակցությո՞ւն ունենալ: «Ոչ, մեր մասնակցությունն անչափ կարեւոր է, որովհետեւ օրակարգն է անչափ կարեւոր. Ղարաբաղի կարգավորման գործընթաց, այնուհետեւ՝ Վրաստանի, Իրանի, Աֆղանստանի, Ղրիմի ճգնաժամի հետ կապված հարցեր եւ, վերջապես՝ Ադրբեջանում մարդու իրավունքների եւ բարեփոխումների ընթացք»:

Իսկ այդ սեմինարին չմասնակցող մեր ռազմավարական գործընկեր Ռուսաստանին դուր կգա՞ մեր մասնակցությունը ՆԱՏՕ-ի նման կարգի սեմինարին: «Մենք առաջնորդվում ենք մեր շահերով»: Ի դեպ, հունիսի 28-ից հուլիսի 2-ը Բաքու է պատրաստվում մեկնել նաեւ մեկ այլ խորհրդարանական պատվիրակություն՝ ԵԱՀԿ խորհրդարանական վեհաժողովին մասնակցելու: Պատվիրակության հիմնական կազմում Արտաշես Գեղամյանից ու Ստեփան Մարգարյանից բացի ընդգրկված է Ստեփան Դեմիրճյանը, ով հրաժարվել է Բաքու մեկնելուց, նրա փոխարեն մեկնում է Աղվան Վարդանյանը:

Շարունակությունը` «Հրապարակ»-ի այսօրվա համարում: