Նախիջևանի հետ սահմանի լարվածությունը պետք է մտահոգի ՀԱՊԿ-ին. Հովհաննես Իգիթյան

Նորացված ՀՀՇ կուսակցության անդամ Հովհաննես Իգիթյանի գնահատմամբ` Ադրբեջանը փորձում է անցնել սադրանքների ավելի բարձր մակարդակի և Հայաստանին նյարդայնացնել` լարվածության մեջ պահելով նաև Նախիջևանի սահմանից: Ըստ Իգիթյանի` գուցե Ադրբեջանին նման վերաբերմունքի և ագրեսիայի առիթ են տվել Ղազախստանի նախագահ Նուրսուլթան Նազարբաևի և ԵԱՀԿ ՄԽ ԱՄՆ նախագահ Ջեյմս Ուոլրիքի հայտարարությունները: «Այս համատեքստում Ադրբեջանը կարող է իրեն ամենազոր զգալ, քանի որ Ռուսաստանից գնել է զենքի աննախադեպ քանակ, և գուցե սպառազինությունը նրան նման վստահություն է տալիս»,- ասաց Հովհաննես Իգիթյանը` հավելելով, որ հավատում է ՀՀ պաշտպանության նախարար Սեյրան Օհանյանի հայտարարություններին առ այն, որ սահմանին լարվածություն միշտ էլ եղել է, և հայկական զինված ուժերը վերահսկում են իրավիճակը: Ըստ Իգիթյանի` հարցը ոչ միայն զինվորականների, այլև քաղաքական գործիչների մտահոգության կենտրոնում պետք է լինի, քանի որ 2009 թվականից սկսած առաջին անգամ է, որ լարված է Նախիջևանի հետ սահմանը: Ըստ քաղաքական գործչի, չի բացառվում, որ այս կերպ Ադրբեջանը փորձում է ներքաշել Թուրքիային' որպես հակամարտության կողմ, և այս առումով պետք է ոչ միայն անհանգստանա, այլև լուրջ քայլեր ձեռնարկի նաև ՀԱՊԿ-ը:

«Եթե Ղարաբաղի հետ սահմանի լարվածության պարագայում ՀԱՊԿ-ից հայտարարում էին, որ Ղարաբաղն իրենց անդամ պետություն չէ և չեն կարող խառնվել, ապա Նախիջևանի պարագայում խնդիրը վերաբերում է Հայաստանին, և այստեղ ՀԱՊԿ-ը անհանգստանալու և միջոցներ ձեռնարկելու խնդիր ունի»,- ասաց Իգիթյանը:

Հունիսի 5-ին հրադադարի կանոնների խախտում էր տեղի ունեցել, ինչի հետևանքով հայկական ԶՈւ երկու պայմանագրային զինծառայողներ էին զոհվել' Անդրանիկ Սամվելի Եղոյանը (ծնվ. 1988թ., Արարատի զ/կ) և Բորիս Բենիկի Գասպարյանը (ծնվ. 1992թ., Արարատի զ/կ):