Կիսելյովը ռուսական քարոզչամեքենայի մանր ներկայացուցիչ է, և կարիք չկար նրան մեծ ուշադրություն դարձնել

Ռուս մեկնաբան Դմիտի Կիսելյովը ռուսական քարոզչամեքենայի մանր նեկայացուցիչ է, ում լրավամիջոցը շատ հաճախ է Ռուսաստանում հայկական սփյուռքի ներկայացուցիչներին ստորադասում: Նորացված ՀՀՇ անդամ Հովհաննես Իգիթյանը հիշում է, որ մեկ տարի առաջ էլ ռուս մեկնաբանի լրատվամիջոցը հայ վարորդին ներկայացրեց որպես բառաչող և երեքրոպեանոց ռեպորտաժի ժամանակ մի քանի անգամ կրկնեց «կանացի խալաթով տղամարդը» արտահայտությունը: Հունիսի 12-ին լրատվամիջոցների հետ հանդիպման ժամանակ Հովհաննես Իգիթյանը նշեց, որ Կիսելյովին Հայաստանում չպետք է ընդունեին այդքան բարձր մակարդակով, պատվեին որպես բարձր հյուրի, որպեսզի նա էլ հայ ժողովրդին նման խորհուրդներ տար և Հայաստանի իշխանությունների փոխարեն որոշեր, թե Հայաստանում որ լեզուն պետք է զարգանա և երիտասարդները որ երկրում և ինչ պետք է սովորեն:

«Կիսելյովը ռուսական քարոզչամեքենայի մանր ներկայացուցիչ է, և կարիք չկար նրան այդքան պատվել և ընդհանրապես նրա խոսքերը կարևորել: Հայաստանը Ռուսաստանի հետ քննարկելու հարցեր ունի, սակայն այդ հարցերը չպետք է ուղղվեն Կիսելյովին: Կարելի էր գուցե Կիսելյովին հարցնել, թե ինչու է իր երկիրն այքան մեծ քանակությամբ զենք վաճառում Ադրբեջանին»,- ասաց Իգիթյանը` հավելելով, որ Կիսելյովն այն անձնավորությունը չէ, ում պետք է անդրադառնալ և ում կարծիքը դարձնել համընդհանուր քննարկման թեմա:

«Ռուսաստանն այսօր» միջազգային տեղեկատվական գործակալության գործադիր տնօրեն, Հայաստանում«Գրիբոյեդով» ակումբի հիմնադիր, ռուս մեկնաբան Դմիտրի Կիսելյովը Հայաստանի Ազգային ժողովում՝ «Եվրասիական ինտեգրացիայում ոչ կառավարական կազմակերպությունների դերը» խորագրով «Հայ-ռուսական բարեկամության» խորհրդարանական ակումբի 5-րդ նիստում մտահոգություն էր հայտնել, որ Հայաստանում պետք է ավելի մեծ ուշադրություն դարձնել ռուսաց լեզվին, եւ դա բխում է Հայաստանի անվտանգությունից: