Կիսելյովյան դրաման և ՀՀ ԱԺ անողնաշարավորները. ինչու՞ ԱԺ փոխնախագահի ներկայությամբ արհամարհվեցին ՀՀ օրենքները

Ազգային ժողովի ՀՀԿ-ական փոխնախագահ Հերմինե Նաղդալյանը, ով հայ լրագրողների դեմ մղած հերոսամարտերում ավելացրել է ուսադրի աստղերի թիվը, օրերս ԱԺ-ում հայտնվել է նվաստացուցիչ դրության մեջ՝ այդ նույն դրության մեջ դնելով ամբողջ հայկական պետությանը:

Պուտինի վարչակազմի խոսափողը համարվող «Россия сегодня» լրատվական գործակալության ղեկավար Դմիտրի Կիսելյովը չորեքշաբթի Ազգային ժողովում տեղի ունեցած քննարկման ժամանակ սկանդալային հայտարարություններ էր արել` ասելով, թե Հայաստանում պետք է ավելացնել ռուսական դպրոցների թիվը, փոխել «Լեզվի մասին» օրենքը, այլապես դա կազդի անվտանգության ոլորտում հայ-ռուսական համագործակցության վրա:

Սույն քարոզիչը նաև դժգոհել էր, որ Հայաստանում տաքսիստներն անգամ ռուսերեն հաշվել չգիտեն, չնայած Հայաստանի խորհրդարան էր ներխուժել թանկարժեք «Համմեր»-ով և դիմավորվել էր անձամբ ԱԺ փոխնախագահի մակարդակով: Իսկ կրեմլյան խոսափողի «մունաթին» ՀՀ առանցքային պաշտոնյաներից մեկը համարվող «ասֆալտի տիրուհին» հակադարձելու այլ բան չգտավ, քան այն, որ Հայաստանի դպրոցներում ուսուցանվում է ռուսերեն և որ տաքսիստները չէ, որ պետք է ազդեն հայ-ռուսական ռազմավարական գործընկերության վրա:

Իսկ ԱԺ անողնաշար էակներից մեկը չզլացավ տեղից հիշեցնել, որ Հայաստանում կա ռուս-հայկական Սլավոնական համալսարան՝ արդարանալով խրոխտ ռուս լրագրողի առաջ:

Ի դեպ, երկրի օրենսդիր մարմնի ղեկավարի տեղակալի ներկայությամբ բացահայտ խախտվեց ՀՀ օրենսդրությունը, սակայն «պախանի» ներկայացուցչի ներկայությամբ ջերմեռանդորեն ժպտացող տիկինը ոչ միայն չկանխեց այդ երևույթը, այլև չնկատելու տվեց: Նա հավանաբար մոռացել էր, որ Հայաստանում պետական լեզուն հայերենն է և խորհրդարանում տեղի ունեցած հանդիպումը ամբողջությամբ անցկացրեց ռուսաց լեզվով՝ առանց զուգահեռ թարգմանության:

Ստրկամտության ևս մեկ, բացահայտ դրսևորում. Կիսելյովին խորհրդարան են մտցրել հատուկ պատիվներով և մեքենան կայանել անմիջապես ԱԺ շենքի մուտքի մոտ: Ընդունված կարգի համաձայն, Ազգային ժողովի տարածք մեքենայով կարող են մուտք գործել միայն խորհրդարանի խոսնակը, փոխնախագահները, հանձնաժողովների և խմբակցությունների ղեկավարները: Մյուսները պարտավոր են ոտքով հասնել խորհրդարանի շենքին: Բայց, ինչպես տեսնում եք, ռուս լրագրողի համար հատուկ բացառություն է արվել: Այդքանից հետո, իհարկե, նա պետք է իրեն շրջապատած անողնաշարավորներին նայեր վերևից և «մունաթ» գար:

Մնում է հասկանալ, թե ինչու էր ԱԺ փոխնախագահ տիկինը, ով բոլորովին օրեր առաջ վիրավորել էր իր մասնագիտական պարտքը կատարող հայ լրագրողին, նվաստացած նստել հակասական վարքագծով հայտնի ռուս լրագրողի կողքին՝ կուչ եկած, և Կիսելյովի հակահայկական մտքերին արձագանքում էր ցրված ժպիտով:

Եզրակացությունը մեկն է. երկու դեպքում էլ ուղղակիորեն վտանգված էր նրա կերակրատաշտը. հայ լրագրողի դեպքում՝ սկանդալային բացահայտման հնարավորության տեսքով, իսկ Կիսելյովի՝ Նաղդալյանից դժգոհ մնալու հնարավոր հետևանքները ինքներդ եք պատկերացնում...

Վարուժան Բաբաջանյան

Տեսանյութը` Azatutyun.am-ի