ԲՀԿ-ն ցանկանում է կանխել էլետրաէներգիայի սակագնի թանկացումը

«Բարգավաճ Հայաստան» կուսակցությունն ամեն ինչ անելու է` Հայաստանում էլեկտրէներգիայի սակագնի բարձրացումը կանխելու համար: Այս մասին Ազգային ժողովում ճեպազրույցների ժամին հայտարարեց ԱԺ ԲՀԿ խմբակցության քարտուղար Նաիրա Զոհրաբյանը: «Մենք հանդիպել ենք Հանրային ծառայություններ կարգավորող հանձնաժողովի նախագահ Ռոբերտ Նազարյանի հետ, և պետք է ասեմ, որ նրա հիմնավորումները թանկացման վերաբերյալ մեզ համար ընդունելի չեն, և մենք ամեն ինչ անելու ենք այդ թանկացումը կանխելու համար»,- ասաց նա:

Նաիրա Զոհրաբյանը հիշեցրեց, որ լրագրողների հետ զրույցում Ռոբերտ Նազարյանը չի բացառել, որ այդ ֆինանսական ճեղքերը, որ առաջացել են համակարգում կարող են էլեկտրաէներգետիկ համակարգում գործող ընկերությունների վատ մենեջմենթի արդյունք լինել: «Ուստի այս դեպքում, մենք աբսուրդ ենք համարում, որ այդ ընկերությունների վատ մենեջմենթի համար պետք է վճարի Հայաստանի Հանրապետության քաղաքացին»,- ասաց նա:

ՀՀ հանրային ծառայությունները կարգավորող հանձնաժողովն իր նախաձեռնությամբ սկսել է էլեկտրաէներգիայի արտադրության և ծառայությունների մատուցման, ինչպես նաև վերջնական սպառողներին վաճառվող էլեկտրաէներգիայի սակագների վերանայման գործընթացը: ՀՀ հանրային ծառայությունները կարգավորող հանձնաժողովի նախնական գնահատմամբ՝ էլեկտրաէներգետիկական համակարգի ընկերությունների ֆինանսական կայունության և սպառողներին հուսալի ու անվտանգ էլեկտրամատակարարման ապահովման նպատակով անհրաժեշտ է շուրջ 20 մլրդ դրամ (առանց ԱԱՀ-ի) լրացուցիչ գումար: Ընկերությու ններում առաջացող ֆինանսական ճեղքվածքը փակելու համար նախատեսվում է բոլոր սպառողական խմբերին մատակարարվող էլեկտրաէներգիայի գործող սակագների բարձրացում' 3,8-4,3 դրամ/կՎտժ-ի (ներառյալ ԱԱՀ-ն) սահմաններում: