Քառյակի առաջարկներն անպատասխան չեն մնա. Վահրամ Բաղդասարյան

Ազգային ժողովի ոչ իշխանական քառյակի առաջարկները որևէ կերպ անպատասխան չեն մնա: Այս մասին Ազգային ժողովում ճեպազրույցների ժամին ասաց ԱԺ ՀՀԿ խմբակցության ղեկավար Վահրամ Բաղդասարյանը: «Մենք մանրամասն քննարկել ենք քառյակի պահանջները: Եթե դուք ուշադրություն եք դարձրել, այդ առաջարկների մեծամասնությունը ընդգրկված են կամ կառավարության ծրագրում, կամ դրանց վերաբերյալ մենք ելույթներ ենք ունեցել ամբիոնից, և ասել ենք, որ այդ կետերից որևէ մեկն անպատասխան չի մնա»,- ասաց նա:

Հարցին, թե իշխանությունները պատրաստվո՞ւմ են մինչև սեպտեմբերի 30-ը ընդունել քառյակի պահանջները, ՀՀԿ խմբակցության ղեկավարը նշեց, որ ինքն այնքան էլ կողմնակից չէ ժամկետների սահմանմանը, քանի որ դրանք քայլեր են, որոնք կարող են աստիճանաբար իրականացվել նաև կառավարության ծրագրի շրջանակներում, ուստի ժամկետներ սահմանել այդ կետերի կատարման համար ընդունելի չէ:

Անդրադառնալով 100 տոկոս համամասնական ընտրակարգի անցնելու քառյակի պահանջին՝ Վահրամ Բաղդասարյանն ընդգծեց, որ այդ հարցը հնարավոր է քննարկել սահմանադրական բարեփոխումների հայեցակարգի վերաբերյալ անցկացվող քննարկումների շրջանակներում: «Երբ մենք այս հարցի հետ կապված օրենսդրական նախաձեռնություն էինք քննարկում Ազգային ժողովի լիագումար նիստում, մեր ընդդիմադիր գործընկերներից շատերը նշում էին, թե ինչ կապ ունի հարցը սահմանադրական բարեփոխումների հետ, սակայն այդ բարեփոխումների շրջանակներում մենք պետք է քննարկենք նաև այն հարցը, թե ինչպես պ ետք է հետագայում ձևավորվի Ազգային ժողովը: Եվ նորից եմ ցանկանում կրկնել՝ քաղաքականության մեջ ես ոչինչ չեմ բացառում»,- ասաց ՀՀԿ խմբակցության ղեկավարը: