ԱԺ ՀՀԿ խմբակցության ղեկավարը կարևորում է էլեկտրաէներգիայի սակագնի հարցով քննարկումները

Էլեկտրաէներգիայի սակագնի հնարավոր թանկացման նախաշեմին հարկավոր է ամեն ինչ անել սպառողների շահերը պաշտպանելու համար: Այս մասին Ազգային ժողովում ճեպազրույցների ժամանակ նշեց ԱԺ ՀՀԿ խմբակցության ղեկավար Վահրամ Բաղդասարյանը: «Մենք պետք է աշխատենք, որ ինչքան հնարավոր է պաշտպանենք սպառողների շահերը, սակայն մենք պետք է ելնենք նաև իրավիճակից' թե ինչ հնարավորություններ կան»,- ասաց նա:

Բաղդասարյանն ընդգծեց, որ շատ լավ է, որ հունիսի 17-ին խորհրդարանում հարցի վերաբերյալ խորհրդարանական լսումներ են անցկացվելու, որին ներկա կլինեն նաև Հանրային ծառայությունները կարգավորող հանձնաժողովի և էներգետիկայի նախարարության ներկայացուցիչներ: «Իմ կարծիքով' այդ քննարկումների ժամանակ բոլոր այն հարցերին, որոնք հետաքրքրում են և՛ ընդդիմությանը, և իշխանությանը, և՛ սպառողներին անդրադարձ կլինի, որից հետո արդեն մենք կկարողանանք հանդես գալ մեր առաջարկություններով»,- ասաց նա:

ՀՀԿ խմբակցության ղեկավարը նկատեց, որ այս պահին չի կարող որևէ բան ասել, սակայն լսումներից հետո արդեն, երբ պարզ կլինեն հնարավորությունները, կարվեն համապատասխան առաջարկները:

ՀՀ հանրային ծառայությունները կարգավորող հանձնաժողովն իր նախաձեռնությամբ սկսել է էլեկտրաէներգիայի արտադրության և ծառայությունների մատուցման, ինչպես նաև վերջնական սպառողներին վաճառվող էլեկտրաէներգիայի սակագների վերանայման գործընթացը: ՀՀ հանրային ծառայությունները կարգավորող հանձնաժողովի նախնական գնահատմամբ` էլեկտրաէներգետիկական համակարգի ընկերությունների ֆինանսական կայունության և սպառողներին հուսալի ու անվտանգ էլեկտրամատակարարման ապահովման նպատակով անհրաժեշտ է շուրջ 20 մլրդ դրամ (առանց ԱԱՀ-ի) լրացուցիչ գումար: Ընկերություններում առաջացող ֆինանսական ճեղքվածքը փակելու համար նախատեսվում է բոլոր սպառողական խմբերին մատակարարվող էլեկտրաէներգիայի գործող սակագների բարձրացում' 3,8-4,3 դրամ/կՎտժ-ի (ներառյալ ԱԱՀ-ն) սահմաններում:

Ազգային ժողովի տնտեսական հարցերի մշտական հանձնաժողովը հունիսի 17-ին խորհրդարանական լսումներ կկազմակերպի էլեկտրաէներգիայի սակագնի թանկացման վերաբերյալ: