Վահրամ Բաղդասարյանը լուրջ չի վերաբերվում Կիսելյովին

Ազգային ժողովի ՀՀԿ խմբակցության ղեկավար Վահրամ Բաղդասարյանը լուրջ չի վերաբերվում ռուս լրագրող Դմիտրի Կիսելյովի` օրերս ՀՀ Ազգային ժողովում հնչեցրած հայտարարություններին: «Ես Կիսելյովին դիտարկում եմ որպես անհատ, այլ ոչ թե որևէ պետության կողմից լիազորված անձնավորություն, և լուրջ չեմ վերաբերվում նրան և նրա հայտարարություններին: Եվ ես սա բոլորի ներկայությամբ բացահայտ ասում եմ»,- Ազգային ժողովում ճեպազրույցների ժամին նշեց Բաղդասարյանը:

Անդրադառնալով Կիսելյովի հայտարարությանը, թե Հայաստանում պետք է ավելի շատ ուշադրություն դարձնեն ռուսերենին, Բաղդասարյանը նշեց, որ ՀՀ պետական լեզուն հայերենն է, սակայն իշխանությունները երբեք չեն ժխտել, որ մեր երկրում կարևորվում է նաև օտար լեզուների ուսուցումը՝ լինի դա ռուսերեն, անգլերեն, թե ֆրանսերեն: «Ինչ վերաբերում է նրա հայտարարություններին, թե Հայաստանում տաքսու վարորդները ռուսերեն չգիտեն, կամ ընդհանրապես նրա այլ հայտարարություններին և ելույթներին, ես դրանց լուրջ չեմ վերաբերվում և չեմ արժեվորում»,- նշեց ՀՀԿ խմբակցության ղեկավարը:

«Ռուսաստանն այսօր» միջազգային տեղեկատվական գործակալության գործադիր տնօրեն, Հայաստանում «Գրիբոյեդով» ակումբի հիմնադիր, ռուս մեկնաբան Դմիտրի Կիսելյովը Հայաստանի Ազգային ժողովում՝ «Եվրասիական ինտեգրացիայում ոչ կառավարական կազմակերպությունների դերը» խորագրով «Հայ-ռուսական բարեկամության» խորհրդարանական ակումբի 5-րդ նիստում մտահոգություն էր հայտնել, որ Հայաստանում պետք է ավելի մեծ ուշադրություն դարձնել ռուսաց լեզվին, եւ դա բխում է Հայաստանի անվտանգությունից: