Ռոբերտինո Լորետտին հունիսի 19-ին բարեգործական համերգ կտա Արցախում

ԼՂՀ մայրաքաղաք Ստեփանակերտի մշակույթի տանը հունիսի 19-ին կկայանա նշանավոր իտալացի երգիչ Ռոբերտինո Լորետտիի բարեգործական համերգը: Լորետտին Արցախ կայցելի իր դաշնակահար Ֆաբրիցիո Մասիի և աշակերտի' տասներկուամյա Ֆելքիս Քարամյանի հետ: «Արմենպրես»-ի հետ զրույցում համերգի կազմակերպիչ Cadence music centre-ի տնօրեն Նիկա Բաբայանն ասաց, որ Ֆելիքս Քարամյանն ապրում է Նիժնի Նովգորոդ քաղաքում, սակայն արմատներով Ղարաբաղից է: Լորետտին դասավանդում է Ֆելիքսին' համարելով նրան ապագա աստղ և անցյալ տարվանից ուսուցիչն ու աշակերտը համատեղ համերգներ են տվել Բալթյան և Սկանդինավյան երկրներում:

«Արցախում համերգի կազմակերպման պատճառները տարբեր են, սակայն գլխավոր այն է, որ Ֆելիքսն արցախցի է և շատ էր ցանկանում պապենական հողում համերգ ունենալ: Ինչ վերաբերում է Ռոբերտինո Լորետտիին, նա նույնպես շատ ոգևորված է Արցախ այցելության գաղափարով: Մենք նրան տեղեկացրել ենք ամենակարևոր խնդրի' Բաքվի, այսպես կոչված, «սև ցուցակների» մասին: Երգիչը գիտի, որ եթե նա մտնի Արցախ, ապա կկորցնի բազմաթիվ համերգներ տալու հնարավորությունը Ադրբեջանում, իսկ նա շատ բարձր հոնորարներով համերգներ է ունեցել Բաքվում: Սակայն մեր այս դիտարկմանը, Լորետտին ասաց, որ եթե կա մի երկիր, որ պայման է դնում, որ մի երկրում համերգ տալն ու գործունեություն իրականացնելը, կարող է դուր չգալ մեկ այլ պետության, ապա նա գերադասում է այդ երկրի հետ գործ չունենալ: Նա գիտե, որ Ադրբեջանում էլ ելույթներ չի ունենալու, սակայն այդ հարցն իրեն չի մտահոգել և նա մեծ ուրախությամբ գալիս է Արցախ համերգի»,- ասաց Նիկա Բաբայանը:

ԼՂՀ մշակույթի նախարար Նարինե Աղաբալյանն էլ շեշտեց, որ սա առաջին դեպքը չէ, երբ համաշխարհային մեծության աստղերը գալիս են Արցախ, հանդիպելու արցախցուն: Սա ճանաչման ոչ պաշտոնական, սակայն լավագույն ձևերից է, քանի որ Արցախը ճանաչում է ստանում աշխարհում իր մշակույթով, պատմությամբ և մարդկանցով: Առավել հատկանշանական է, որ Արցախ այցելող հյուրերին նախապես տեղեկացվում է Բաքվի «սև ցուցակի» մասին, սակայն նրանք, այդ ցուցակներին և հարևան պետության արտաքին քաղաքականությանը վերաբերվում են մի թեթև հումորով և կարծես թե արհամարհանքով:

Սա Լորետտիի առաջին համերգն է Արցախում. նախատեսվում է, որ մինչև տարեվերջ Լորետտին համերգ կտա նաև Երևանում, իսկ 2015թ. կրկին կայցելի Արցախ: Բացի համերգներից չի բացառվում, որ երգիչը նաև դասախոսություններ և վարպետության դասերի անցկացնի հայ պատանի երգիչների համար:

2011թ. Ռոբերտինո Լորետտին Ֆելիքս Քարամյանին հայտարարեց իր միակ և պաշտոնական աշակերտը: Այդ ժամանակ Ֆելիքսը 10 տարեկան էր և սովորում էր Նիժնի Նովգորոդի երգչխմբային քոլեջում: Լորետտին Ֆելիքսին նվիրեց իր հեղինակած Amore («Սեր») ստեղծագործությունը, որը գրվեց այնպիսի ձայնի համար, ինչպիսին նա ուներ մանկության տարիներին: Այդ օրվանից նա վարպետության դասեր է տալիս Ֆելիքսին, իսկ 2013թ. նրանք կազմակերպել են հյուրախաղեր: Վերջերս Ֆելիքս Քարամյանը թողարկել է նաև առաջին ձայնասկավառակը, որտեղ կա 15 երգ:

Ռոբերտիննո Լորետտիի ստեղծագործական կարիերան սկսվել է 1960թ., երբ 17-րդ օլիմպիական խաղերի ժամանակ Հռոմում կատարել է «O Sole mio» ստեղծագործությունը: Այդ ժամանակ նրա տաղանդը նկատել է մանկական հեռուստահաղորդումների պրոդյուսեր Սաիր Վոլմեր Սյորենսենը և նրա հետ պայմանագիր է կնքեց: Մեկ շաբաթ անց Կոպենհագենում մանկական հաղորդման ժամանակ Լորետտիին ելույթ է ունեցել և միանգամից ձեռք բերել հռչակ: Ավելի ուշ, ձայնագրված «O Sole mio» ձայնասկավառակը դարձել է ոսկե: Շուտով 70-ամյակը տոնող Լորետտիի օրակարգը շատ խիտ է, համերգային հյուրախաղեր, ձայնագրություններ և վարպետության դասեր:

Հասմիկ Հարությունյան