Լենինգրադյան-Իսակով մայրուղին կմիացնի երեք վարչական շրջան. կենտրոնը կբեռնաթափվի, վարորդը կխնայի 20 րոպե

Հայաստան 14 Հունիս, 2014 19:41

Երևանի կենտրոնը բեռնաթափող Լենինգրադյան փողոցը Իսակովի պողոտային կապող անընդհատ երթևեկությամբ քաղաքային ավտոմայրուղին մոտ 15-20 րոպեով կկրճատի նշյալ հատվածը վարորդների կողմից անցնելու ժամանակը: 22 ամիս կառուղվող մայրուղին նշանակալի դեր կունենա Երևանի բեռնված կենտրոնի երթևեկության համար` կապելով Աջափնյակ, Կենտրոն, Մալաթիա Սեբաստիա վարչական շրջանները:

Երեւանի քաղաքապետ Տարոն Մարգարյանի խոսքով` ճանապարհի կառուցումը նախատեսված է եղել դեռևս 70-ական թվականներին: «Բայց ինչ-ինչ պատճառներով չէր կառուցվել: Մենք Երևանի գերպլանում 2005-2020 թվականներին ընդգրկեցինք այս ճանապարհի ծրագիրը: Այն կարևոր փողոց է, քանի որ բեռնաթափում է կենտրոն վարչական շրջանը և երեք վարչական շրջաններ կապում է միմյանց: Մենք հետագայում նախատեսում ենք Իսակով-Արշակունյաց ճանապարհի կառուցումը»,- հայտնեց Տարոն Մարգարյանը:

Քաղաքապետի հավաստմամբ` ճանապարհը կառուցելիս ցուցաբերվել է նորովի մոտեցում: «Անցկացվել է 12 կմ ոռոգման ցանց, նոր լուսավորության համակարգ, տեղադրվել են դիոդային լույսեր, կանաչապատվել է 5 հեկտար տարածք, որը գտնվում է խնամքի ներքո: Անցկացվել է 4 կիլոմետրանց կոյուղագիծ, որը կծառայի նաև հարակից տարածքում կառուցապատվելիք բնակելի թաղամասին»,-ասաց քաղաքապետը:

Ճանապարհի կառուցման առաջին իսկ օրվանից, քաղաքապետի խոսքով, ինքը հետևել է աշխատանքներին: «Մոտ 400 աշխատակիցներ օր ու գիշեր աշխատել են ճանապարհի վրա, որի որակը գնահատում ենք բավարար: Իհարկե, ընթացքում եղել են թերություններ, որոնք շտկվել են: Այսօր կարող ենք ասել, որ ունենք բարձր որակի ու անվտանգ ճանապարհ: Մեր քաղաքացիները հանգիստ կարող են օգտվել արդեն»,-հայտնեց Տարոն Մարգարյանը:

«Երևաննախագիծ» ՓԲԸ տնօրեն Սիրեկան Օհանյանի գնահատմամբ` կառուցված մայրուղին քաղաքի կենտրում տարանցիկ երթևեկություն ապահովող վերջին տարիներին նախագծված ու կառուցված ամենակարևոր ճանապարհներից մեկն է: «Այս մայրուղու նախագծմամբ ու կառուցմամբ` մենք հնարավորություն ենք ունենում պակասեցնել քաղաքի կենտրոն մտնող տրանսպորտային միջոցների քանակը: Նոր ճանապարհի բացման արդյունքում կբեռնաթափվի Ծիծեռնակաբերդի խճուղին, Հաղթանակի կամուրջը և հնարավորություն կստեղծվի Լենինգրադյան փողոցն անմիջապես կապել Իսակովի հետ և դուրս գալ անմիջապես օդանավակայանի ճանապարհ և դեպի հարավային դարպաս»,-ասաց Սիրեկան Օհանյանը:

Նրա խոսքով` նոր կառուցված ավտոմայրուղին քաղաքային նշանակության անընդհատ երթևեկության մայրուղի է, որը հնարավորություն է տալիս խուսափել յուրաքանչյուր տեսակի տեխնիակական միջոցներից, լուսանշաններից և այլն: «Կարծում եմ` թույլատրելի արագությունը կլինի 60 կմ/ժ: Նման բարձր որակով կառուցված ճանապարհի վրա բարձր արագությամբ երթևեկելը վտանգավոր կարող է լինել»,-ասաց պաշտոնյան:

Ճանապարհի շինարարությունն իրականացրած «Սահակյան Շին» ՓԲԸ տնօրեն Սուրեն Սահակյանն էլ հավաստիացրեց, որ 10-15 տարի մայրուղին շինարարական աշխատանքների կարիք չի ունենա: «Ճանապարհը կառուցված է ժամանակակից նորմերին համապատասխան ու բավականին նորամուծություններ կան, որոնք ամբողջ աշխարհում կիրառվում էին, մեզ մոտ սկսվել են նոր օգտագործվել»,-ասաց նա:

Հարցին ի պատասխան, թե արդյոք հաշվի առնվել է փաստը, որ անձրևային օրերին Լենինգրադյան փողոցում ջրեր են գոյանում, Սուրեն Սահակյանը նշեց. «Այո, հաշվի առնվել է, ամբողջ Կիևյան-Կոմիտաս փողոցի ջրերը հոսելու են ու լցվեն այստեղից դեպի Հրազդան գետը»:

Երևանի նախկին քաղաքապետ Մուրադ Մուրադյանն էլ ուրախ է, որ երկար դադարից հետո նմանատիպ ծրագրերը իրականություն են դառնում: «Ուրախալի է, որ նմանատիպ ծրագրեր իրականացվում են, քանի որ ինձանից հետո 11 քաղաքապետ փոխվեց, բայց ոչ մեկի օրոք չկառուցվեց որևիցե հետիոտն կամ տրանսպորտային հանգույց: Շատ ուրախալի է, որ այդ գործունեությունը վերականգնվեց Երևանի քաղաքապետ Երվանդ Զախարյանի օրոք, և լավագույն ձևով այդ ավանդույթը շարունակում է քաղաքապետ Տարոն Մարգայանը»,-ասաց նախկին քաղաքապետը: Մուրադյանի պաշտոնավարման տարիներին կառուցվել են ստորգետնյա արագընթաց ճանապարհներ: «Կառուցվել է Լենինի (ներկայում` Մաշտոցի) պողոտայի և Կարմիր բանակի (ներկայում` Գրիգոր Լուսավորչի) փողոցի խաչմերուկի ստորգետնյա անցումը, Քոչարի ու Ազատության պողոտայի տրանսպորտային հանգույցը, հետիոտն անցումը և այլն»,-ասաց Մուրադ Մուրադյանը:

Նախկին պաշտոնյան, կարևորելով կիսատ գործերը շարունակելու քաղաքապետերի ավանդույթը, խորհուրդ տվեց, դուրս գալ խիտ կենտրոնից ու ծավալվել քաղաքի շրջակայքում ու տալ լուծումներ, որոնք չեն խանգարի սովորական մարդու օրվա կենցաղը:

Հունիսի 14-ին ՀՀ Նախագահ Սերժ Սարգսյանի մասնակցությամբ բացվեց նորակառույց Լենինգրադյան փողոցը Իսակովի պողոտային միացնող մայրուղին: