ԱԺ պատգամավոր Արման Սահակյանը շուտափույթ վերաբնակեցում է մաղթել ազատագրված Քեսաբին

ՀՀ ԱԺ պատգամավոր Արման Սահակյանը բոլոր քեսաբցիներին և հայերին շնորհավորել է սիրիական հայաբնակ Քեսաբ քաղաքի ազատագրման առթիվ: «Արմենպրես»-ի հաղորդմամբ` այս մասին ԱԺ պատգամավորի ֆեյսբուքյան էջի գրառման մեջ ասված է.

«Շնորհավորում եմ քեսաբցիներին և աշխարհասփյուռ հայերին Քեսաբը սիրական զորքերի կողմից ազատագրելու կապակցությամբ: Այս հարցում անգնահատելի է նախագահ Ասադի դերակատարությունը, ով ամեն ինչ արեց իր խոստումը պահելու համար: Շուտափույթ վերաբնակեցում ու բարգավաճում եմ մաղթում Քեսաբին և խաղաղություն ողջ սիրիական ժողովրդին»:

Սիրիական բանակը հսկողություն էր հաստատել Լաթաքիայի հյուսիսում գտնվող Քեսաբ գյուղաքաղաքի վրա՝ վերականգնելով կայունությունն ու անվտանգությունը` ոչնչացնելով տասնյակ զինյալների: Հունիսի 14-ին բանակը առաջխաղացում է գրացնել Երկու Աղբյուր (Էքիզոլուք, Ան Նաբային) և Գարատուրան բնակավայրերի ուղղությամբ: Թուրք-սիրիական սահմանի մերձակայքում և Լաթաքիայի հյուսիսում գտնվող Քեսաբ գյուղաքաղաքի վրա հարձակումը սկսվել է մարտի 21-ին Թուրքիայի սահմանի մի քանի կետերից: Գյուղաքաղաքից բնակիչների մեծ մասը տեղափոխվել է առավել ապահով վայրեր, հիմնականում Լաթաքիա, իսկ որոշ ընտանիքներ, այդ թվում` մեծահասակներ, մնացել են իրենց տներում, հետո գերի վերցվել զինյալների կողմից:

Արման Սահակյանը ԱԺ այն պատգամավորների խմբում էր, ովքեր տեղում ստեղծված իրավիճակին ծանոթանալու նպատակով ապրիլին մեկնել էին Սիրիա: Այցի շրջանակներում ԱԺ պատգամավորները հանդիպել են նաև Սիրիայի նախագահ Բաշար ալ Ասադի հետ: