Վարչապետի դրամային կայսրությունը. Քըրք Քրքորյանը կվաճառի Լաս Վեգասի կազինոները և փողը կներդնի Աբրահամյանի այգիներում

ՀՀ Ազգային ժողովի պատգամավոր Նիկոլ Փաշինյանը ոչ վաղ անցյալում ԱԺ-ում Հովիկ Աբրահամյանից հետաքրքրվեց, թե ինչպե՞ս է ստացվել, որ վարչապետը և նրա հետ փոխկապակցված անձը 2013թ.-ին հայտարարագրել են 5,5 մլն դոլարի եկամուտ:

Անդրադառնալով իր անձնական եկամուտներին՝ վարչապետն ասաց, որ երբեք չի թաքցրել իր ունեցվածքը և որ հողագործությամբ է զբաղվել մինչև այն պահը, երբ օրենքը թույլ է տվել:

Նիկոլ Փաշինյանը զարմացավ, թե ինչպե՞ս է ստացվում, որ ամբողջ հանրապետությունում գյուղացիները հող են մշակում՝ տոկոսի տակ են ընկնում, իսկ վարչապետը հող է մշակում և միլիոնավոր դոլարներ է վաստակում. «էս հատուկ ձև ունե՞ք, էդ ո՞նց եք անում»: Ի պատասխան՝ Հովիկ Աբրահամյանը հայտարարեց, որ Փաշինյանին եթե հող էլ տան, չի կարողանա մշակել, գործարարությամբ կյանքում չի կարող զբաղվել՝ «կյանքում չեք կարող անել, դուք մենակ քննադատում եք»…

Բավականին հետաքրքիր այս հայտարարություններից հետո թվում էր, թե վարչապետի եկամուտների ծագման մասին բոլոր կասկածները այլևս սպառված են, բայց արի ու տես, որ Հովիկ Արգամիչն այդ հայտարարությամբ իրեն դրեց բավականին բարդ դրության մեջ:

Ահավասիկ. վարչապետի պաշտոնը ստանձնելիս Հովիկ Աբրահամյանը սեփական եկամուտների մասին հայտարարագիր է ներկայացրել: Ըստ ապրիլի 28-ին ներկայացրած այդ հայտարագրի՝ նրա դրամական միջոցները կազմել են 269 միլիոն դրամ և 1 մլն 940 հազար ԱՄՆ դոլար:

Նրա տարեկան եկամուտը կազմում է 44 մլն 110 հազար դրամ, որից միայն 4 մլն 110 հազարն է գոյանում աշխատավարձից:

Ամուսնուց մի փոքր ավելի հարուստ է Հովիկ Աբրահամյանի կինը՝ Ջուլիետա Աբրահամյանը, ում դրամական միջոցները կազմել են 300 մլն դրամ և 2 մլն 850 հազար դոլար: Նրա տարեկան եկամուտը կազմում է 45 մլն դրամ:

Ստացվում է, որ վարչապետը ոչ միայն ահռելի դրամական եկամուտներ է կուտակել, այլև տարեցտարի նրա քսակը շարունակում է պարարտանալ:

Ընդունենք, որ նա այդ միջոցները կուտակել է այն ժամանակ, երբ օրենքը թույլ էր տալիս, և կարողացել է «սև օրվա» համար «մի քանի կոպեկ» հետ գցել: Բայց հետաքրքիրն այն է, որ վարչապետը շարունակում է տիկնոջ հետ միասին տարեկան մոտ 90 մլն դրամ աշխատել այն դեպքում, երբ օրենքը վաղուց արդեն պաշտոնյաներին արգելում է գործարարությամբ զբաղվել:

Միթե այսքանից հետո ծիծաղելի չեն վարչապետի պնդումները՝ գյուղատնտեսության նշանակալի աճի արդյունքում միլիոններ կուտակելու մասին:

Եթե ելնենք վարչապետի՝ սուրբ լինելու կանխավարկածից և վստահենք բացառապես պաշտոնական վիճակագրությանը (համարենք, որ նա իր ունեցվածքը հայտարարագրել է ամբողջությամբ), ապա անգամ այդ դեպքում եկամուտների այսպիսի ծավալը ուղղակի չի տեղավորվում ոչ միայն Հայաստանի, այլև աշխարհի ամենահարուստ գյուղատնտեսների առավելագույն զամբյուղում: Հակառակ պարագայում Բիլ Գեյթսը իր «Microsoft»-ի գրասենյակների փոխարեն լոլիկի պլանտացիաներ կցաներ, Քրքորյանն էլ կվաճառեր Լաս Վեգասի իր կազինոները և փողը կներդներ Աբրահամյանի այգիներում...

Եվ, ցավոք, ճշմարտությունը մեկն է. վարչապետի և նրա նման «գյուղատնտեսների» համար Հայաստանը մեծ բոստան է, որտեղ իրենք հերկել ու մշակել են անխնա, մարդկանց դրել բանջարաբոստանային կուլտուրաների տեղ և հարստացել:

Իսկ հիմա, ինչու ոչ, կարող են օրը ցերեկով ԱԺ ամբիոնից ձեռք առնել մարդկանց և մի հատ էլ «մունաթ» գալ, որ մինչ այլախոհները պաշտոնյաների դրամապանակներում կեղտոտ փողեր են փնտրում՝ նրանք այգիներում միլիարդատերեր են դառնում...

Վարուժան Բաբաջանյան