Կյանքի և մահու կռիվ են տալիս 2 երեխա՝ Էրիկ Հայրապետյանը (10 տարեկան) և Վաղարշակ Հակոբյանը (7 տարեկան)

Biglemon.am կայքը կազմակերպում է «Հասցրու օգնել» բարեգործական ակցիան, որը կանցկացվի հունիսի 16-30-ը: Ակցիայի շրջանակում յուրաքանչյուրը կարող է գումար հանգանակել սկսած 300 դրամից:

Նվիրաբերված ամբողջ հասույթը կտրամադրվի հիվանդ երեխաների բուժմանը:

Ինչպես նշում են ակցիայի կազմակերպիչները, Biglemon.am-ի և «Քեզ Հետ» հ/կ-ի ակցիան կոմերցիոն նախագիծ չէ: Այն իր բոլոր հովանավորների հետ ձեռնարկված բարեգործական հիմունքներով ծրագիր է, որի նպատակն է ինչ-որ չափով նպաստել այս երեխաների ապագայի կերտմանը:

-Ի՞նչը կարող է ավելի լավ լինել, քան փրկված երեխայի ժպիտը: Մենք փնտրում ենք բարի սրտեր, որպեսզի հասցնենք օգնել այս փոքրիկներին,- մեզ հետ զրույցում ասաց Biglemon.am-ի փոխտնօրեն Օքսանա Լոբախինան:

Իսկ «ՔեզՀետ» հ/կ տնօրեն Վարդուհի Ադամյանը հավելեց.

- Այս ակցիայի շրջանակներում կոչ ենք անում բոլոր նրանց, ովքեր անտարբեր չեն և չեն ափսոսի տրամադրել իրենց գումարը, մեզ հետ միասին օգնել գումար հավաքել երեխաների թանկարժեք բուժման ծախսերը գոնե ինչ-որ չափով թեթևացնելու համար:

Այս պահին կյանքի և մահու կռիվ են տալիս 2 երեխա՝ Էրիկ Հայրապետյանը (10 տարեկան) և Վաղարշակ Հակոբյանը (7 տարեկան):

Էրիկ Հայրապետյանի մոտ առկա է է գլխուղեղի վնասվածք և նա մշտապես գտնվում է բժիշկների հսկողության տակ: Հիվանդությունը մեծապես խոչընդոտում է երեխայի բնականոն ապրելակերպին: Ըստ Առողջապահության նախարարության և Արաբկիր բժշկական համալիրի բժշիկների ներկայացրած փաստաթղթի՝ Հայաստանում բուժական պրոցես իրականացնել հնարավոր չէ, հիվանդության բուժումն ու վիրահատությունը պետք է իրականացվի արտերկրում:

Վաղարշակ Հակոբյանի մոտ առկա է զարգացման ընդհանուր պերվազիվ խանգարում՝ աուտիզմ: Երեխային հարկավոր է տարեկան նվազագույնը երեք անգամ մեկամսյա ժամանակահատվածով պարապմունք հոգեբանի և լոգոպեդի հետ: Երեխան չի խոսում: