«Հրապարակ». Պարտադիր բաղադրիչը հարկատեսակի վերածելը հակասահմանադրական չէ

Իրավապաշտպան Արտակ Զեյնալյանը, ով ապրիլի 2-ին ոչ իշխանական ուժերի հայցն էր ներկայացնում ՍԴ-ում, ասում է, որ պարտադիր բաղադրիչը հարկատեսակի վերածելը հակասահմանադրական չէ: «Օրենքում պարտադիր բաղադրիչը, միանշանակ, հակասահմանադրական էր, քննարկման ենթակա չի՝ դա լավ կլիներ, թե վատ կլիներ:

Լավ կլիներ, եթե անձն ուզենար կամավոր կուտակեր, բայց ոչ՝ երբ նրան պարտադրում են: Իսկ որ սոցիալական ապահովությունը պետք է արվի, եւ դա պետք է արվի հարկատուի հաշվին, դա նորմալ է, հակասահմանադրական չէ»: Իրավապաշտպանը ներկայացված փաթեթին մանրամասն ծանոթանալուց հետո միայն կասի՝ հասարակությանը սորտավորելն իր հերթին չի՞ հակասում արդյոք սահմանադրականությանը:

Հանդիպման մասնակից ՀՅԴ-ական տնտեսագետ Արա Նռանյանն ասում է, որ ներկայացված մեխանիզմն ընդամենը հնի խմբագրված տարբերակն է. «Հիմնական խնդիրները, որոնք մատնանշել էր ՍԴ-ն՝ տարիքային խտրականություն, պարտադիրի առկայություն, ըստ էության, չեն վերանում: Իրական, բովանդակային փոփոխություն այստեղ չկա, կա որոշակի խմբագրում:

Եթե սոցիալական վճար է, ապա դա պետք է բոլորի նկատմամբ կիրառվի, այլ ոչ թե խտրական մոտեցմամբ, որը, չի բացառվում, նույնպես կարող է Սահմանադրության հետ խնդիրներ առաջ բերել»: Նռանյանն ասում է, որ շաբաթ օրն իրենց անակնկալ զանգահարել են եւ հապշտապ հրավիրել քննարկման, նրանք ընդհանրապես ծանոթ չեն եղել, ՀՀԿ-ն ներկայացրել է առաջարկներ, իրենք էլ ծանոթացել են: Նռանյանը դեռ մանրակրկիտ չի հասցրել ուսումնասիրել ներկայացվող նախագիծը, բայց հիմնական մեխանիզմներին ծանոթ լինելով, վստահեցնում է՝ ոչինչ չի փոխվել: ՀՅԴ-ն առաջիկայում կներկայացնի իր առաջարկները, որոնց մասին ՀՅԴ-ականը լռում է:

Շարունակությունը` «Հրապարակ»-ի այսօրվա համարում: