Ռոբերտ Նազարյանը համաձայն չէ տեսակետի հետ, թե էլեկտրաէներգիայի սակագինը բարձրանում է ընկերությունների վատ մենեջմենթի պատճառով

Ազգային ժողովում էլեկտրաէներգիայի սակագնի բարձրացման վերաբերյալ խորհրդարանական լսումների ժամանակ ԲՀԿ խմբակցության քարտուղար Նաիրա Զոհրաբյանը ՀԾԿՀ նախագահ Ռոբերտ Նազարյանից հետաքրքրվեց, թե ի՞նչ գնով են վաճառվել Հայաստանի էլեկտրական ցանցերը, ի՞նչ ներդրումներ էին իրենք խոստացել այս տարիների ընթացքում և դրանցից որքա՞նն է կատարվել: Ի պատասխան Հանրային ծառայությունները կարգավորող հանձնաժողովի նախագահ Ռոբերտ Նազարյանը նշեց, որ ՀԷՑ-ը վաճառվել է 40 միլիոն դոլարին համարժեք գումարով: «Ինչ վերաբերում է ներդրումներին, վաճառվելուց հետո մինչև 2007 թվականը որևէ ներդրում «Հայաստանի Էլեկտրական ցանցերում» չի եղել: Ինչպես գիտեք, 2007թ. տեղի ունեցավ սեփականատիրոջ փոփոխություն, 2007-ից հետո 80 միլիարդ դրամին համարժեք ներդրումներ են կատարվել այս տաҀիների ընթացքում: Ներդրումների հիմնական մասը նպատակաուղղված է եղել հուսալի և անվտանգ էլեկտրամատակարարում ապահովելուն»,- ասաց Նազարյանը` հավելելով, որ ձգտել են ամրագրված ստանդարտներին համապատասխան աշխատել և անջատումների տևողությունը հասցնել այն քանակությանը, ինչն ամրագրված է էլեկտրաէներգիայի մատակարարման և օգտագործման կանոններում:

Նա նշեց, որ էլեկտրաէներգիայի ընդհատումները երկու ժամից ավելի չեն կարող լինել Երևանում և ութ ժամից ավել չեն կարող լինել մարզերում, և եթե այդ տևողությունից ավելի է թույլ տալիս մատակարարը, ապա գործում են տույժեր: Վերջին անգամ այդ տույժերը դարձել են ավտոմատ ռեժիմով, այսինքն` բաժանորդն այլևս դիմում չի ներկայացնում էլեկտրական ցանցեր, այլ հաշվարկն ավտոմատ կերպով է կատարվում:

Նաիրա Զոհրաբյանի այն դիտարկմանը, որ այժմ ՀՀ քաղաքացիները պարտավոր են էլեկտրաէներգիայի սակագինն ավելի շատ վճարել էլեկտրաէներգիա մատակարարող ընկերությունների վատ մենեջմենթի պատճառով, Նազարյանը չհամաձայնեց. «Ընդամենը մեր կանխատեսումների արդյունքում սակագնային մարժայով նախատեսված առաջացած վնասի մասին է խոսքը»,- ասաց Նազարյանը: