Բաքվում բարկացած են, որ Ռոբերտինո Լորետին Ստեփանակերտում բարեգործական համերգ է տալու

«Իտալիայի ոսկե ձայն», աշխարհահռչակ իտալացի երգիչ Ռոբերտինո Լորետիի` հունիսի 19-ին Ստեփանակերտում կայանալիք բարեգործական համերգը ստիպել է Բաքվին կրկին ընկել հիստերիայի մեջ: Ադրբեջանական մի շարք կայքեր զարմանք և տարակուսանք են հայտնել, որ հերթական համաշխարհային աստղը ցանկություն է հայտնել Արցախում համերգ տալ: Ինչպես հաղորդում է vesti.az-ը, Լո րետիի համերգի հետ կապված տեղեկություններն անհանգստացնում են ադրբեջանցի հասարակությանը: Այդ առթիվ ռուս արտիստ և երգահան Սերգեյ Ապատենկոն զրուցել է Ռոբերտինոյի հետ և տեղեկացրել, թե ինչ հետևանքներ կարող են առաջանալ Լեռնային Ղարաբաղում իր ելույթից հետո։

«Ես խոսել եմ նրա հետ։ Իսկապես, մոտ օրերին ակնկալվում է Ռոբերտո Լորետիի այցը Հայաստան։ Ես նրան զգուշացրել եմ Լեռնային Ղարաբաղում ելույթ ունենալու հետևանքների մասին և ուզում եմ նշել, որ նա իմ խոսքերին բավականին լուրջ է վերաբերվել»,- ասել է Ապատենկոն։

Ադրբեջանական կողմը զրուցել է նաև Իտալիայում Լորետիի ներկայացուցիչ Ֆաբրիցիո Մասչիի հետ: Baku.az-ի փոխանցմամբ, Մասչին փոխանցել է, որ Լորետին իսկապես պլանավորել է ելույթ ունենալ Լեռնային Ղարաբաղում։

Ադրբեջանի արտաքին գործերի նախարարությունն էլ հրահանգել է Իտալիայում Ադրբեջանի դեսպանին կապ հաստատել երգչի հետ և նրա ուշադրությունն ուղղել այն փաստին, որ Արցախ այցելությունը պաշտոնական Բաքվի համար անթույլատրելի է և եթե Լորետին այցելի Ստեփանակերտ, ապա բազմաթիվ այլ հայտնի արվեստագետների, քաղաքական գործիչների ու լրագրողների նման կհայտնվի Բաքվի «սև ցուցակում» և կհամարվի «պերսոնա նոն գրատա»: