Ախալցխայի քաղաքագլուխ կդառնա Գեորգի Կոպաձեն

Ախալցխայի՝ Սամցխե Ջավախքի տարածաշրջանի վարչական կենտրոնի քաղաքագլխի ընտրություններում առաջատարը իշխող «Վրացական երազանք» կոալիցիայից թեկնածու Գեորգի Կոպաձեն է, որն ընտրությունները շահում է առաջին փուլում: Այդ մասին հաղորդել է Վրաստանի Կենտրոնական ընտրական հանձնաժողովը:

Հունիսի 15-ին Վրաստանում տեղի են ունեցել շրջանային ու քաղաքային խորհուրդների (սակրեբուլո) ընտրությունները, ինչպես նաև 59 շրջանային վարչակազմերի ղեկավարների ուղղակի ընտրությունները: Վրաստանի պատմության մեջ առաջին անգամ ուղղակի քվեարկության ճանապարհով ընտրվել են ոչ միայն Թբիլիսիի քաղաքագլուխը, այլև Վրաստանի 11 ինքնակառավարվող քաղաքների ղեկավարները:

Հանրապետության ԿԸՀ-ի նախնական տվյալների համաձայն՝ Գեորգի Կոպաձեն հավաքել է ընտրատեղամասեր եկած ընտրողների ձայների 60,44 տոկոսը: Առաջին փուլում հաղթելու համար թեկնածուին անհրաժեշտ էր հավաքել ընտրողների ձայների 50 տոկոսից ավելին:

Ընդամենը Ախալցխայի քաղաքապետի պաշտոնին հավակնում էր չորս թեկնածու: Երկրորդ տեղում «Միասնական ազգային շարժում» նախկին իշխող կուսակցությունից թեկնածու Գելա Դեմետրաձեն է, որը հավաքել է ձայների 31,03 տոկոսը: «Նինո Բուրջանաձե-Միավորված ընդդիմություն միավորումից» թեկնածու Զազա Նաթանաձեն ստացել է ձայների 4,38 տոկոսը, իսկ «Սալոմե Զուրաբիշվիլի-Վրաստանի ուղին» միավորումից Կոբա Ատոշվիլին՝ 4,15 տոկոսը, հաղորդել է «Նովոստի Գրուզիա»-ն: