Գազի հարցով ԱԺ ժամանակավոր հանձնաժողովի գործունեության ժամկետը կերկարաձգվի

ՀՀ Ազգային Ժողովի` գազամատակարարման խնդիրների ուսումնասիրության ժամամանակավոր հանձնաժողովը առաջիկա օրերին հանդես կգա հաղորդմամբ, որով կներկայացնի այս ընթացքում հանձնաժողովի կատարած աշխատանքի արդյունքները: Այս մասին հանձնաժողովի հերթական նիստի ավարտից հետո լրագրողների հետ զրույցում տեղեկացրեց հանձնաժողովի նախագահ, ԱԺ տնտեսական հարցերի մշտական հանձնաժողովի նախագահ Վարդան Այվազյանը: «Մենք այս ընթաց քում բավականին աշխատանք ենք կատարել: Գիտեք, որ հանձնաժողովում աշխատանքները 4 ենթախմբի էին բաժանված, և հանձնաժողովի անդամները յուրաքանչյուրն իր ենթախմբում լուրջ աշխատանքներ են տարել»,- հայտնեց նա:

Վարդան Այվազյանը նշեց նաև, որ դեռևս բավական աշխատանք կա անելու, իսկ հանձնաժողովի գործունեության ժամկետը փաստորեն ավարտել է: «Առաջիկա արտահերթ նիստի ընթացքում մենք հանդես կգանք միջանկյալ զեկույցով, որով կառաջարկենք երկարացնել հանձնաժողովի գործունեության ժամկետը»,- ասաց նա՝ ընդգծելով, որ նախատեսվում է մինչև տարեվերջ երկարացնել հանձնաժողովի գործունեության ժամկետը, քանի որ աշխատանքները շատ են, և դրանց իրականացման համար շատ ժամանակ է հարկավոր:

Հանձնաժողովի նախագահը կարծիք հայտնեց, որ այն վերջնական արդյունքում կարող է դրական արդյունքներ տալ: Վարդան Այվազյանը չցանկացավ մանրամասնել, թե այս ընթացքում ինչ բացահայտումներ են եղել՝ առաջարկելով սպասել երկու օր, երբ պատրաստ կլինի հաղորդման տեքստը, որը կընթերցվի նաև խորհրդարանի ամբիոնից: