Արթուր Բաղդասարյանը առաջիկա օրերին կներկայացնի ՕԵԿ քաղաքական գերակայությունները

ՕԵԿ նախագահ Արթուր Բաղդասարյանը իր վերջին ասուլիսում երբ հրաժարական տվեց Ազգային անվտանգության խորհրդի քարտուղարի պաշտոնից, հայտարարեց, թե «Օրինաց երկիր» կուսակցությունը առաջիկայում կներկայացնի իր քաղաքական օրակարգի գերակայությունները: Առ այսօր այդ քաղաքական ուժը չի հայտարարել իր նոր քաղաքական գերակայությունների մասին, ինչի առնչությամբ էլ Lurer.com-ի թղթակիցը զրուցեց ԱԺ «Օրինաց երկիր» խմբակցության պատգամավոր Իշխան Խաչատրյանի հետ.

«Դուք ճիշտ եք նշում` պարոն Բաղդասարյանը իսկապես հայտարարեց, որ ՕԵԿ-ն առաջիկայում կհրապարակի իր քաղաքական օրակարգի գերակայությունները: Քաղաքական մեր օրակարգի մասին վերջին շուրջ 2 ամիսների ընթացքում խոսել են նաև մեր խմբակցության պատգամավորները: Իհարկե, մեծ հաշվով, փակագծեր չեն բացվել, սակայն կարող եմ նշել, որ այս ժամանակահատվածում մենք ինտենսիվորեն աշխատել ենք այդ համապարփակ փաստաթղթի վրա, որը վաղվա ՕԵԿ քաղխորհրդի նիստում կներկայացվի քննարկման: Փաստաթուղթը կքննարկվի նաև կուսակցության ընդլայնված վարչության նիստում և հաստատվելուց հետո մենք այն կհրապարակենք»:

Պատգամավորին խնդրեցինք` որոշ փակագծեր բացի քննարկվող փաստաթղթի վերաբերյալ, սակայն նա զերծ մնաց փակագծեր բացելուց` այն նկատառումից ելնելով, որ առաջիկա օրերին ՕԵԿ նախագահը կհրավիրի մամուլի ասուլիս, որտեղ, ինչպես խոստացել էր, կներկայացնի այդ գերակայությունները.

«Միայն կարող եմ ասել, որ փաստաթուղթը մատնանշում է մեր հանրային կյանքի գրեթե բոլոր ոլորտները, մեր ժողովրդի առջև կուտակված բազմաթիվ խնդիրների լուծման բանալին»,- ասաց պատգամավորը: