«Մենք ջանասիրությամբ ավելացնում ենք մեր սպառազինությունները». Սերժ Սարգսյան

Սերժ Սարգսյանը հայ-ադրբեջանական սահմաններում անընդհատ լարվածություն առաջացնող Ադրբեջանի մարտավարությունը նոր չի համարում. Հայաստանն ականատես է այն գործընթացների զարգացմանը, որոնք արդեն գոյություն ունեն երկար տարիներ: Առաջին լրատվականի «Հարցազրույց» ծրագրի հաղորդավար Նվեր Մնացականյանի հարցին ի պատասխան նշեց ՀՀ Նախագահը: «Այո, հակառակորդը լարվածություն է պահում մեր սահմանների երկայնքով և դրա նպա տակները մի քանիսն են: Բայց ես կարծում եմ, որ ամենակարևոր նպատակն այն է, որ աշխարհին ու բոլորին ցույց տրվի, որ պատերազմը չի ավարտվել և, եթե բանակցային գործընթացում հաջողություններ նրանք չունեցան, ապա անխուսափելի կլինի ռազմական գործողությունների վերսկասումը»,- ասաց Սերժ Սարգսյանը:

Նախագահը ևս մեկ անգամ շեշտեց այն միտքը, որ արտահայտել էր ՀՀԿ վերջին համագումարի ժամանակ: «Եթե հիշում եք, ես ասեցի, անշուշտ, չափազանց կարևոր է, թե ինչպիսի սպառազինությամբ է զորքը գնում մարտի, բայց նաև ասացի, որ առավել կարևոր է, թե կռվողն ով է. հանուն ինչի է կռվում և ում հետ է կռվում: Այդ առումով ես մեկ անգամ ևս պետք է շեշտեմ, որ 94 թվականի մայիսից հետո մենք երբեք նպատակ չենք ունեցել վերսկսելու ռազմական գործողությունները և մեր ողջ նախապատարստական աշխատանքը ուղղված է մեր պաշտպանունակության բարձրացմանը»-ասաց նախագահը` շեշտելով, որ մենք պարբերաբար ջանասիրությամբ ավելացնում ենք մեր սպառազինությունները, ձեռք ենք բերում տեսակներ և կատարելագործում նախկինները: «Իսկ, եթե հարց առաջանա, թե ինչու մենք դրանք ի ցույց չենք դնում, այլ սահմանափակվում ենք միայն զորավարժություններ անցկացնելով կամ էլ մասնակիորեն որոշակի ռեպորտաժներում ինչ-որ բաներ ցուցադրելով, ապա կասեմ, որովհետև մենք դրա կարիք չունենք: Սպառազինություններ ձեռք բերելով ու ամեն վայրկյան դրանք ի ցույց դնելով' տարբեր պետություններ տարբեր խնդիրներ են լուծում: Մեր հասարակությունը, ի տարբերություն ուրիշների, բաց հասարակություն է, և մենք կարիքը չունենք ավելորդ ցուցադրման կամ ցուցամոլության»,-նշեց Նախագահը:

Սերժ Սարգսյանը շեշտեց, որ մեր հասարակության տարբեր ներկայացուցիչներ հնարավորություն ունեն և ունենալու են մշտապես այցելելու տարբեր զորամասեր, տեղյակ լինելու ինչպես զինվորների մարտական ոգու, այնպես էլ մեր զինատեսակների կատարյալ լինելու և մեր զինատեսակների պահանջվող չափով առկա լինելու մեջ: «Մենք շարունակելու ենք այս աշխատանքը, քանի որ անվտանգության խնդիրները մեզ համար առաջնային են: Ոչինչ չենք խնայելու, որ մեր հրաշալի տղաները ունենան այն, ինչն անհրաժեշտ է մեր սահմաններն անառիկ պահելու և մեր անվտանգությունն ապահովելու համար»,-եզրափակեց Նախագահը: