Մագնուս Կարլսենը կայցելի Տաթևի վանք

Հայաստանի զարգացման նախաձեռնություններ (IDeA) հիմնադրամի և Ակրոնիս ընկերության հրավերով, հունիսի 22-24-ը Հայաստան կայցելի Շախմատի միջազգային ֆեդերացիայի (ՖԻԴԵ) վարկանիշային աղյուսակի թիվ 1 շախմատիստ, գրոսմայստեր, աշխարհի գործող չեմպիոն, նորվեգացի Մագնուս Կառլսենը։ Երևանում Կառլսենին կհյուր ընկալի Աշխարհի գավաթակիր, Շախմատի համաշխարհային օլիմպիադայի եռակի հաղթող, Հայաստանի ընտրանու կազմում աշխարհի թիմային առաջնության չեմպիոն, գրոսմայստեր Լևոն Արոնյանը։ Ինչպես «Արմենպրես»-ին տեղեկացրին IDeA հիմնադրամից, այցի շրջանակներում Երևան կժամանեն տեղեկատվական տեխնոլոգիաների ոլորտի հայտնի ներկայացուցիչներ՝ այդ թվում Acronis ընկերության հիմնադիր և գործադիր տնօրեն, Parallels ընկերության և Runa Capital վենչուրային հիմնադրամի հիմնադիր, Ֆիզտեխ միության վարչության անդամ Սերգեյ Բելոուսովը, ռուսական վենչուրային ն երդրող, «Almaz Capital Partners» ընկերության հիմնադիր և կառավարիչ Ալեքսանդր Գալիցկին, Սաութհեմփթոնի համալսարանի նանոֆիզիկայի և ֆոտոնիկայի ամբիոնի վարիչ Ալեքսանդր Կավոկինը, Թաթարստանի Հանրապետության նախագահի տնտեսական հարցերով օգնական Այրատ Խայրուլինը, Parallels Inc. ընկերության նախագահ Բիրգեր Սթենը և այլոք։

Հյուրերը կայցելեն Տաթևի վանք, որտեղ կծանոթանան միջնադարյան վանական համալիրի պատմությանը, ճարտարապետությանը, ինչպես նաև այն ծրագրերին, որոնք IDeA հիմնադրամն իրականացնում է Տաթևում։ Գրոսմայստերները կանցկացնեն շախմատի միաժամանակյա խաղ` 20 խաղատախտակների վրա։ Լավագույն մրցակիցներին կշնորհվեն նվերներ։

Այցի ընթացքում նախատեսված են հանդիպումներ Հայաստանի պետական և հոգևոր բարձրաստիճան այրերի, տեղեկատվական տեխնոլոգիաների և շախմատի ոլորտի ներկայացուցիչների հետ: