«Հրապարակ». Աֆրիկյանների շենքի մոտ մի քանի օր է լարվածությունը չի թուլանում

Աֆրիկյանների շենքի մոտ մի քանի օր է լարվածությունը չի թուլանում։ «Պահպանենք Աֆրիկյանների ակումբի շենքը» նախաձեռնության անդամները պարզապես հերթապահում են շենքի մոտ եւ ամեն ինչ անում են շենքի դեմ ուղղված ոտնձգությունները կանխելու համար: Երեկ նրանք երթ էին անում քաղաքում՝ ի պաշտպանություն հմամենի շենքի: Նրանց պաստառների ու շապիկների վրա գրված էր. «Աֆրիկյանների ակումբի շենքը հին Երեւանն է», «Պահպանենք Աֆրիկանների ակումբի շենքը», կոչ էին անում «բոլոր գիտակից քաղաքացիներին՝ միավորվել՝ անդառնալի ավերումից փրկելու Երեւանի ամենագեղեցիկ ճարտարապետական հուշարձաններից մեկը»։

Ակտիվիստները, որ հազիվ մի քանի տասնյակ երիտասարդներ են, ահազանգել են բոլորին, այդ թվում մարդու իրավունքների պաշտպանի գրասենյակ, մշակույթի նախարարություն: Նախարարության պատմության եւ մշակույթի հուշարձանների պահպանության գործակալության Երեւանի տարածքային բաժնի պետ Կարո Այվազյանը ահազանգից հետո ժամանել է այստեղ, սակայն նրան անգամ թույլ չեն տվել մտնի ապամոնտաժման հրապարակ, նա բանվորների հետ շփվել է հեռվից՝ հորդորելով դադարեցնել աշխատանքները: Ապա կապվել է կառուցապատողի հետ, ինչ որ օրենքներ մատնանշել: Ակտիվիստների խոսքով՝ կառուցապատողն արհամարհել է եւ իրենց, եւ նախարարության հորդորը:

Մինչդեռ պաշտոնյան տեղեկացրել է, որ շինարարները պետք է համապատասխան փաստաթուղթ ներկայացնեն, ապամոնտաժման աշխատանքները սկսելու մասին տեղեկատվություն փակցնեն, ինչը չի արվել: Պայքարը շարունակվում է: Տեսնենք ով կհաղթի՝ իր երկրի ու նրա պատմության համար պայքարող երիտասարդները, թե՞ ամեն ինչ ավերող, սեփական երկրի պատմությունից ու մշակույթից փող քամող վայրենիները, որոնք գործում են իշխանության հովանու ներքո:

Շարունակությունը` «Հրապարակ»-ի այսօրվա համարում: