Պատգամավորները սովոր են ժամը 12:00-ին գալ. Շարմազանովը բացատրում է պատգամավորների՝ ԱԺ չներկայանալը

Ազգային ժողովի արտահերթ նիստը կմեկնարկի 10-15 րոպեների ընթացքում: Այս մասին լրագրողների հետ զրույցում ասաց ԱԺ փոխնախագահ Էդուարդ Շարմազանովը: «Այն, որ քվորում չապահովվեց, հիմնականում պայմանավորված է նրանով, որ մենք սովորաբար նիստերն սկսում ենք ժամը 12:00-ին, սակայն այսօր սկսել ենք ժամը 11:00-ին և պատգամավորները սովոր են ժամը 12:00-ին գալ: Խնդիրը զուտ տեխնիկական է, և հանգիստ եղեք 10-15 րոպեից մենք կսկսենք մեր աշխատանքները»,- ասաց Շարմազանովը՝ ընդգծելով, որ արդեն 65 պատգամավոր կա, և մնացել է մեկ պատգամավոր գա, որից հետո խորհրդարանը կսկսի աշխատանքները:

Անդրադառնալով հարցին, որ ոչ իշխանական ուժերը չեն ներկայացել և գրանցվել, Շարմազանովն ընդգծեց, որ նրանք միշտ մեծամասնությանը մեղադրում են ԱԺ կանոնակարգը խախտելու մեջ և հիմա թող իրենք կողմնորոշվեն գրանցվելն է ճիշտ, թե չգրանցվելը:

Շարմազանովը հիշեցրեց նաև, որ ՀՀԿ-ական մի խումբ պատգամավորներ գտնվում են գործուղման մեջ: ԱԺ արտահերթ նիստը դեռևս չի մեկնարկել քվորում չլինելու պատճառով: ԱԺ նախագահը հայտարարել է երեքժամյա ռեժիմ: